Jambyl oblysynda ata-analar shaǵymynan keıin eskirgen mektep jóndeletin boldy
TARAZ. QazAqparat – Jambyl oblysynyń ákimi Berdibek Saparbaev bir top ata-analardyń shaǵymyna qulaq asyp, olar kótergen máseleniń sheshiletinine sendirdi, - dep habarlaıdy QazAqparat tilshisi.
Memleket basshysynyń bastamasymen qolǵa alynǵan «Halyq únine qulaq asatyn memleket» tujyrymdamasy Jambyl oblysynda sátti júzege asýda. Aıtalyq, áleýmettik jelilerde ata-analar Taraz qalasyndaǵy №31 orta mekteptiń ǵımaraty aıanyshty jaǵdaıda ekendigin, balalar sýyq kabınetterde bilim alyp jatqandyǵyn jazǵan bolatyn.
Aımaq basshysy Berdibek Saparbaev ata-analar shaǵymyna dereý jaýap qatty. Sársenbi, 18 qarasha kúni ol atalǵan mektepke arnaıy baryp, kabınetterdi, sportzal men ashanany aralap, jaı-kúıimen tanysty.
Aıta keteıik, 1963 jyly irgesi qalanǵan ǵımarattyń 57 jyl ishinde eskirip-tozǵandyǵy kózge uryp tur.
«Mektep eshqashan kúrdeli jóndeýden ótken emes. Terezelerdi, edender men esikterdi, shatyryn, káriz, elektr jáne jylýmen jabdyqtaý júıelerin aýystyrý kerek», - deıdi dırektor Marına Alehına.
Aımaq basshysy ata-analar men mektep basshylyǵy kótergen máselelerdiń sheshiletinine ýáde etti.
«Túrli nusqalardy qarastyryp, tıimdisin tańdańyzdar. Mektep kúrdeli jóndeýden ótýi nemese qaıta salynýy kerek. Barlyq jaǵdaılardy eskere otyryp, jobalyq-smetalyq qujattamany daıyndańyzdar», - dep oblys ákimi qurylys jáne bilim basqarmalaryna tapsyrma berdi.
Qazirgi tańda munda 15 kezekshi synypta 199 oqýshy bilim alýda. Berdibek Saparbaev balalardy sanıtarlyq normalardy qatań saqtaýǵa shaqyrdy.
