Jambyl oblysynda asarlatyp úı salý jobasy aıasynda 60 otbasy baspanaly boldy
TARAZ. QazAqparat – Taraz Sherhan Murtaza atyndaǵy «Rýhanııat jáne tarıhtaný» ortalyǵynda oblys ákimi Berdibek Saparbaevtyń tóraǵalyǵymen keńes ótti, onda birqatar basqarma basshylarynyń ıdeologııalyq salada atqarylǵan jumystar týraly esepteri tyńdaldy,- dep habarlaıdy QazAqparat tilshisi.
Oblys ákimdiginiń ishki saıasat basqarmasy basshysynyń orynbasary Maqpal Dosymbekova aǵymdaǵy jyldyń 11 aıyndaǵy bıýdjet qarajatynyń ıgerilýi týraly baıandady.
Memleket basshysynyń qoldaýymen oblysta «Beıbitshilik pen kelisim» jobasy júzege asyrylýda. Turǵyndardyń narazylyǵyn týdyrýy múmkin ózekti máselelerdi eskere otyryp, qaýip-qaterler kartasy ázirlengen. Basqarma aı saıyn oblystaǵy qoǵamdyq-saıası jaǵdaıdy zerdelep otyrady. «Asarlatyp úı salý» jobasy aıasynda 123 úıdiń qurylysy bastalsa, búgingi tańda 60 úıdiń kilti tabystalyp úlgergen. Al, «Úlgili aýyl» baıqaýyna 13 aýyl qatysqan.
Oblys ákimdiginiń dene shynyqtyrý jáne sport basqarmasynyń basshysy Nurbol Júnisbekov aǵymdaǵy jyly atalǵan salany damytýǵa 5,8 mıllıard teńge baǵyttalǵanyn jetkizdi. Sportpen júıeli shuǵyldanatyn jambyldyqtardyń sany 32 paıyzdy nemese 359,3 myń adamdy quraıdy. Oblys turǵyndary úshin qoljetimdi 2590 sport nysany jumys isteıdi. Sporttyń ár túri boıynsha Qazaqstannyń ulttyq quramasynyń quramyna 1121 jambyldyq sportshy engen, bul respýblıkalyq kórsetkishtiń 10,3 paıyzyn quraıdy.
Oblys ákimdiginiń mádenıet, arhıvter jáne qujattama basqarmasy basshysynyń mindetin atqarýshy Sara Mádıevanyń aıtýynsha, aǵymdaǵy jyly oblystyń mádenıet salasyna 7,1 mıllıard teńge, al «Jumyspen qamtýdyń jol kartasy-2020» baǵdarlamasy aıasynda 499,4 mıllıon teńge bólinip, ıgerilýde. «Aýyl – el besigi» baǵdarlamasy boıynsha jalpy somasy 660 mıllıon teńgege úsh mádenı nysannyń qurylysy júzege asyrylýda, al «Tsıfrlyq Qazaqstan» keshendi baǵdarlamasy sheńberinde 139 aýyldyq okrýgte kitaphanalar janynan 202 tsıfrlandyrylǵan aqparattyq jáne kovorkıng ortalyqtary ashyldy.
Basqarma basshysy, karantınge baılanysty naýryz aıynan bastap onlaın rejımde 10444 is-shara ótkizilgenin jetkizdi.
«Qazir kóptegen adamdar óziniń pikirlerin áleýmettik jeli arqyly bildirýde. Kóptegen syndar aıtylýda. Olardiki oryndy. Alaıda, turǵyndar kóbine aımaqta júzege asyp jatqan aýqymdy sharalar týraly bile bermeıdi. Sondyqtan ishki saıasat basqarmasy áleýmettik jelilermen jumys isteýi tıis. Sonymen qatar, úkimettik emes uıymdardyń qyzmetin baqylaýǵa alý qajet. Olarǵa jetkilikti deńgeıde qarajat bólinýde. Jumys ta soǵan saı bolýy kerek. Nege oblystyq fılarmonııa aýyldarǵa baryp, aýyl turǵyndaryna óner kórsetpeıdi? Osyǵan nazar aýdarýyńyzdy suraımyn»,-dedi B.Saparbaev.
Kezdesý sońynda Berdibek Saparbaev «Egemen Qazaqstan» gazetiniń oblystaǵy menshikti tilshisi, jýyrda ǵana «Altyn tobylǵy» ádebı syılyǵynyń laýreaty atanǵan aqyn Hamıt Esamanǵa «Alǵys hat» tapsyrdy.
