Jambyl oblysynda asa iri mólsherde esirtki saqtaǵan turǵyn ustaldy

TARAZ. QazAqparat - Jambyl oblysynyń Shý aýdanynda asa iri mólsherde esirtki zattaryn saqtady degen kúdikpen 47 jastaǵy jergilikti turǵyn ustaldy. Ol 1 mıllıon teńgege esirtki satýdy josparlaǵan, dep habarlaıdy QazAqparat tilshisi.

Jambyl oblysynyń polıtsııa departamenti esirtki qylmysyna qarsy is-qımyl basqarmasynyń qyzmetkerleri «Qarasora-2023» jedel-aldyn alý is-sharasy aıasynda QR ІІM-niń Esirtki qylmysyna qarsy is-qımyl departamentimen jáne «Búrkit» arnaıy maqsattaǵy bólinisimen birlesip júrgizgen.
Tintý jumystaryn júrgizý barysynda jalpy salmaǵy 3 keli 800 gramm esirtki zaty bar paket tabylǵan. Saraptama nátıjesinde bul gashısh esirtki zaty ekeni anyqtaldy. Kúdikti buryn esirtkini belgili bir orynǵa jınap, kómip qoıyp, paketti úıine alyp bara jatqan kezde ustalǵan. Ol qara bazarda bul esirtkini 1 mıllıon teńgege satýdy josparlaǵan. Er adam esirtkimen baılanysty qylmystary úshin birneshe ret sotty bolǵan.

«Ustalǵan azamat kinásin moıyndap, Shý aýdanynyń ýaqytsha ustaý ızolıatoryna qamaýǵa alyndy. Qazirgi ýaqytta osy derekke qatysty QR Qylmystyq kodeksiniń 296-babynyń 4-bóligi, ıaǵnı, asa iri mólsherde esirtki quraldaryn zańsyz saqtaý boıynsha sotqa deıingi tergep-tekserý amaldary bastaldy.
Bul bap 3 jyldan 7 jylǵa deıingi merzimge bas bostandyǵynan aıyrý túrindegi jazany kózdeıdi», – dep habarlady oblystyq polıtsııa departamenti esirtki qylmysyna qarsy is-qımyl basqarmasynyń bastyǵy polıtsııa podpolkovnıgi Álim Bajyqbaev.
Aıta keteıik, buǵan deıin Jambyl oblysynda geroın kontrabandasynyń joly kesilgenin jazǵan bolatynbyz.