Jambyl oblysynda áriptesteriniń kózinshe paraqor polıtseıge úkim shyǵaryldy
ASTANA. QazAqparat - Qordaı aýdandyq sotynda Qordaı AІІB-niń polıtsııa qyzmetkerleri, sýdıalyqqa kandıdattar, sot keńsesiniń qyzmetkerleri jáne BAQ-nyń ókilderiniń qatysýymen Qordaı AІІB-niń polıtsııa qyzmetkeri A.N.-ge qatysty úkim jarııalandy, dep habarlaıdy QazAqparat tilshisi.
Іs qujattarynan anyqtalǵandaı, Almaty qalasynyń aýdanaralyq mamandandyrylǵan ákimshilik sotynyń 2016 jylǵy 13 qańtardaǵy qaýlysymen Qyrǵyz Respýblıkasynyń azamatshasy K. Qazaqstan Respýblıkasynyń «Ákimshilik quqyq buzýshylyqtar týraly kodeksiniń» 517-babynyń 2-tarmaǵynda kózdelgen ákimshilik quqyq buzýshylyqty jasaǵany úshin Qazaqstan Respýblıkasynyń sheginen shyǵarylý túrindegi jazaǵa tartylǵan.
Osyǵan baılanysty K. sot qaýlysy zańdy kúshine engen kúnnen bastap bes kún ishinde Qazaqstan Respýblıkasynyń sheginen shyǵyp ketýi tıis bolatyn, alaıda quqyq buzýshy sottyń sheshimin oryndamaı, Qazaqstan Respýblıkasynyń aýmaǵynda qala bergen.
2017 jylǵy 28 aqpanda ony QR UQK ShQ 2038 áskerı bóliminiń áskerı qyzmetshileri Jambyl oblysy Qordaı aýdanynyń «Qarasý» ótkizý pýnktinde Qazaqstan Respýblıkasynan Qyrǵyz Respýblıkasynyń aýmaǵyna qaraı memlekettik shekarany kesip ótpekshi bolǵanda, qujat tekserý kezinde ustalǵan.
K-ǵa qatysty qylmystyq is 01.03.2017 jyly A.N-niń óndirisine qabyldandy. 2017 jyldyń naýryz aıynyń 7 kúni A.N. memlekettik fýnktsııalardy atqarýǵa ýákiletti tulǵa bola tura, qylmystyq istiń óndirisin qysqartý úshin odan 1000 dollar para alǵany anyqtalǵan.
Jambyl oblysynyń Qordaı aýdandyq soty A.N.-di Qylmystyq kodekstiń 366-babynyń 2-bóliginde (para alý) kózdelgen qylmysty jasaǵany úshin kináli dep tanyp, sottalýshyny memlekettik qyzmette, quqyq qorǵaý organdarynda jumys atqarý quqyǵynan ómir boıyna aıyrýmen jáne qylmystyq jolmen tabylǵan ne qylmystyq jolmen tabylǵan qarajatqa satyp alynǵan múlkin tárkileýmen qatar, oǵan 3 (úsh) jyl 6 (alty) aıǵa bas bostandyǵynan aıyrý jazasyn taǵaıyndap, jazany túzeý kolonııasynyń jalpy rejıminde óteý belgilendi.
Sottalǵan A.N-ge qoldanǵan kepil bas sharasy ózgertilip, sot zalynan qamaýǵa alyndy.
Sottalýshy A.N. «polıtsııa kapıtany» arnaıy sheninen aıyryldy.
Úkim zańdy kúshine engen joq.
Úkim jarııalanǵan keıin BAQ-ń ókilderiniń qatysýymen brıfıng ótkizildi.
