Jambyl oblysynda altyn óndirý kombınatyn salý máselesi talqylandy
ASTANA. QazAqparat - "Questa Capital" kompanııasynyń enshiles uıymy - "Aurum Deutschland" JShS jyl saıyn 5100 keli altyn óndirýdi josparlap otyr.
Búgin Astanada ótken Qazaqstan men Germanııanyń saýda-ekonomıkalyq yntymaqtastyq jónindegi úkimetaralyq jumys tobynyń kezekti otyrysynda atalǵan joba da talqylandy, dep xabarlaıdy QazAqparat tilshisi.
Aıta ketken jón, jańa óndiristik nysannyń jalpy somasy 250 mln eýrony qurap otyr. Ol aqshaǵa Jambyl oblysynyń Qordaı aýdanynda taý-ken kombınatyn salý josparlanǵan. Sońǵy aqparatqa sáıkes, aǵymdaǵy jylda jobanyń texnıkalyq-ekonomıkalyq negizdemesi ázirlenedi. 2019 jyly kombınattyń qurylysy bastalady. Al 2020 jylda altyn óndirý jumysy qolǵa alynady. Shıkizatty Astanadaǵy affınaj zaýytynda óńdeý qarastyrylǵan. Budan bólek, "Aurum Deutschland" JShS jyl saıyn 100 tonna kúmisti shyǵarýdy josparlap otyr.
Aıta keteıik , sońǵy on eki jyldyń ishinde Germanııa elimizdiń ekonomıkasyna 4 mlrd dollardan astam qarjy quıdy. "Ol aqshanyń 90 paıyzy shıkizattyq emes sektorǵa baǵyttaldy. Búgingi otyrysta biz naqty jobalardy qarastyrdyq. Bizde 60-tan astam ortaq jobalar bar. Sonyń jalpy somasy 5 mlrd dollardan asady", - deıdi QR Investıtsııalar jáne damý vıtse-mınıstri Erlan Qaıyrov.
