Jambyl oblysynda áleýmettik-ekonomıkalyq damýdyń oń dınamıkasy saqtalýda
TARAZ. QazAqparat – Jambyl oblysy ákimi Berdibek Saparbaevtyń tóraǵalyǵymen beınekonferentsııa rejıminde ótken oblys ákimdiginiń keńeıtilgen májilisinde aǵymdaǵy jyldyń birinshi jartyjyldyǵynyń áleýmettik-ekonomıkalyq damý qorytyndylary qaraldy, dep habarlaıdy QazAqparat tilshisi.
Jambyl oblysynda áleýmettik-ekonomıkalyq damýdyń barlyq negizgi kórsetkishteri respýblıkalyq ortasha kórsetkishten joǵary deńgeıde qamtamasyz etilgen. Atqarylǵan jumys az emes. Alaıda ol jolda kezdesken kedergiler de joq boldy. Oblys ákimi baıandamashylardan ketken kemshilikter men olardy joıý joldaryna basa nazar aýdarý kerektigin eskertti.
Ekonomıka jáne bıýdjettik josparlaý basqarmasynyń basshysy Gúldana Jaýynbekova esepti merzimde ekonomıkalyq ósim 101 paıyzdy quraǵanyń dep habarlady. Ónerkásip óndirisinde (101,5%), aýyl sharýashylyǵynda (102,7%), qurylysta (121,2%) oń dınamıka baıqalady. Turǵyn úıdi paıdalanýǵa berý 10,9 paıyzǵa nemese 250 myń sharshy metrge artqan. 139,2 mlrd.teńge ınvestıtsııa tartylsa, bul 6,4 paıyzǵa kóp.
Bul kezeńde óńirdegi ónerkásiptik kásiporyndar 237,5 mlrd. teńgeniń ónimin óndirse, naqty kólem ındeksi 101,5 paıyzdy qurady. Saladaǵy ósimge taý-ken, óndeý ónerkásibi, elektrmen jabdyqtaý, sýmen jabdyqtaýdaǵy oń kórsetkishterdiń esebinen qol jetkizildi. Osy oraıda artta qalǵandar qataryna Merki (ótken jyldyń sáıkes kezeńinen 1,3 paıyz az) jáne Moıynqum (3,6 paıyz) aýdandary kiredi. Moıynqum, Qordaı, Sarysý aýdandarynda usaq mal basy, Baızaq, Merki aýdandarynda túıe sany, Jambyl aýdanynda qus azaıǵandyǵy belgili bolǵan. Al, Sarysý jáne Shý aýdandary ınvestıtsııa tartý boıynsha jumystarda álsizdik tanytqan.
Berdibek Saparbaev aýdan ákimderinen qatań talap qoıyp, barlyq kórsetkishterdiń ósýin qamtamasyz etýdi tapsyrdy. Ol jaǵdaıdy jaqsartýǵa jáne joǵalǵan ýaqyttyń ornyn toltyrýǵa bolatynyn atap ótip, bul máseleler toǵyz aıdyń qorytyndysy boıynsha qaıta qaralatynyn jetkizdi.
Basqosý barysynda oblys ákiminiń orynbasary Berik Nyǵmashev aýylsharýashylyq jerlerin tıimdi paıdalaný baǵytynda qolǵa alynyp jatqan sharalar týraly baıandady.
Onyń aıtýynsha, óńirdegi aýyl sharýashylyǵy daqyldarynyń barlyq túrleriniń egistik alqaby 715,0 myń gektardy qurasa, bul ótken jyldyń sáıkes kezeńimen salystyrǵanda 27,9 myń gektarǵa artyq. 2 myń gektardan astam jaıylymdyq jer egistik alqapqa aınaldy. Sondaı-aq, jyl saıyn jeke sharýa qojalyqtarynan turaqty tabys alatyn aýyl turǵyndarynyń sany da artyp keledi. Jyl basynan beri 36,4 myń gektar jer memleket menshigine qaıtarylǵan. 30 myń gektar alqapta resýrstardy únemdeý tehnologııasy qoldanylýda.
Baıandama sońynda Berik Nyǵmashev keıbir aýdandar aýylsharýashylyq daqyldaryn sebý josparyn tolyǵymen oryndamaǵanyn tilge tıek etti. Aıtalyq, Baızaq, Jambyl, Qordaı, Shý aýdandarynda maıly daqyldardy sebý jospary, Qordaı, Talas, Shý aýdandarynda - qant qyzylshasy, Taraz jáne Jýaly aýdanynda – kartop otyrǵyzý mejesine qol jetkizilmegen.
«Jýaly aýdanynda kartop basym baǵyttaǵy daqyldar qataryna enedi. Aýdan ákimi men aýyl ákimderiniń jaǵdaıdy baqylaýdan qalaı shyǵaryp alǵandyǵy túsiniksiz. Bizdiń qunarly jerimiz óz qajettilikterimizdi tolyq óteýge múmkindik beredi. Tek ákimder bul máselelermen baıypty túrde aınalyspaı otyr. Barlyǵy óz betinshe jumys isteýge úırengen», - deıdi Berdibek Saparbaev.
Ol jańa aýylsharýashylyq tehnologııalaryn engizý, aýyl turǵyndarynyń turmystyq tabysyn arttyrýǵa negizdelgen pılottyq jobanyń múmkindikterin barynsha paıdalanýdy tapsyrdy.
Alqa jumysyn qorytyndylaı kele, Berdibek Saparbaev barlyq máselelerdi qysqa merzimde sheshý kerektigin qadap aıtty.
«Memleket basshysy jumyspen qamtý máselesine aıryqsha nazar aýdarýdy tapsyrdy. Jergilikti jerlerde qajetti barlyq sharalar qabyldanýy tıis. Birinshi jartyjyldyqta oblystyń áleýmettik-ekonomıkalyq damýy oń nátıje kórsetti desek, ósim negizgi kórsetkishtermen qamtamasyz etildi. Bul qarqyndy báseńdetýge bolmaıdy. Bizdiń ortaq mindetimiz – jyldyń aıaǵyna deıin ekonomıkany qalpyna keltirý, turaqtylyqty saqtaý jáne barlyq josparlanǵan kórsetkishterdiń oryndalýyn qamtamasyz etý boıynsha sharalar qabyldaý», - dep qorytyndylady Berdibek Saparbaev.
