Jambyl oblysynda aldaǵy jyly jańartylatyn energııa arqyly 415,1 MVt óndiriledi
NUR-SULTAN. QazAqparat – Búgin Úkimet otyrysynda Jambyl oblysynyń ákimi Berdibek Saparbaev óńirde jańartylatyn energııa salasyndaǵy jobalar týraly aıtty, dep habarlaıdy QazAqparat tilshisi.
«Óńirde jańartylatyn energııa kózderin damytý jumystary Qazaqstan Respýblıkasynyń «Jasyl ekonomıkaǵa» kóshý jónindegi tujyrymdamasyna sáıkes josparly túrde júzege asyrylyp keledi. Qazirgi kezde oblysta jańartylatyn energııa kózderimen 16 nysan aınalysady. Onyń beseýi sý elektr stantsııasy, altaýy jel elektr stantsııasy jáne beseýi kún elektr stantsııasyna tıesili. Ótken jyly barlyǵy 318,4 MVt energııa kózin qamtydy. Qazirgi ýaqytta bul respýblıkalyq kórsetkishtiń shamamen 20 paıyzyn qurap otyr», - dedi oblys ákimi.
Onyń aıtýynsha, jalpy 2020 jyly oblysta 2,5 mlrd kVtsaǵ elektr energııasy óndirilse, onyń 24 paıyzy jańartylatyn energııa kózderi arqyly óndirilgen. 2019 jylmen salystyrǵanda, 2020 jańartylatyn energııa kózderi 47 paıyzǵa ósti.
«Qazirgi kezde óńirde 4 nysannyń qurylysy júrip jatyr. Olardyń múmkindigi qosymsha 96,7 MVt energııa qýatyn beredi. Sonyń ekeýi jel jáne qalǵan ekeýi sý elektr stantsııasy. Bıyl osylardyń jartysy iske qosylsa, qalǵany aldaǵy jyly paıdalanýǵa beriledi», - dedi B. Saparbaev.
Nátıjesinde, 2022 jyly óńirde jańartylatyn energııa kózderi arqyly óndiriletin elektr energııasy 415,1 MVt-qa jetkiziletin bolady.
«Jospar boıynsha 2025 jylǵa deıin qosymsha taǵy 4 stantsııany iske qosýdy josparǵa engizdik. Sonda qosymsha 218 MVt energııany óndiretin bolamyz. Tartylatyn ınvestıtsııa 96 mlrd teńgeniń quraıdy. Qosymsha 845 jumys orny ashylady», - dedi óńir ákimi.
