Jambyl oblysynda alaıaqtyq qylmysy 82 paıyzǵa artqan
Basqosýda aǵymdaǵy jyldyń birinshi toqsanyndaǵy esirtki bıznesine qarsy is-qımyl máseleleri, sondaı-aq, 2018-2020 jyldary ótken sybaılas jemqorlyq pen kóleńkeli ekonomıkaǵa qarsy kúres jónindegi is-sharalardyń qorytyndylary qaraldy.
Oblys ákimi atap ótkendeı, esepti kezeńde jalpy qylmys sany 7,8 paıyzǵa tómendegen, alaıda keıbir qylmys túrleri boıynsha ósim tirkelgen. Aıtalyq, esirtki qylmysy 64 paıyzǵa, alaıaqtyq – 82 paıyzǵa, jol-kólik oqıǵalarynan qaza bolǵandar kórsetkishi 39 paıyzǵa artqan.
«Jastardyń qatysýymen oryn alatyn oqıǵalardyń qaıtalanyp otyrǵandyǵy alańdatady. Bul rette mektepter men oqýshylardyń ata-analarynyń birlesken jumysynyń álsizdigi aıqyn baıqalady, - dedi Berdibek Saparbaev.
Polıtsııa departamenti bastyǵynyń orynbasary Nurjan Qalmetovtyń aıtýynsha, birinshi toqsanda 196 esirtki qylmysy jasalǵan, 154 kılogramnan astam tyıym salynǵan zattar tárkilengen. Jastar arasynda 117 aldyn alý is-sharalary, atap aıtsaq dárister, dóńgelek ústelder, semınarlar ótkizilgen. Esirtkini jarnamalaıtyn 14 saıt buǵattalyp, 250 graffıt-jazýlary joıylǵan. Shý alqabyna keletin bolsaq, Nurjan Qalmetov 1989 jyly jasalǵan jabaıy soranyń ósý kartasyn jańartýdy usynyp, arnaıy tehnıka men drondardy satyp alýǵa kómek kórsetýdi surady. Kóptegen marıhýana jetkizýshiler qıyn soqpaqtarda atpen kesip ótýdi jón kóredi desek, bul olardy qolǵa túsirýdi qıyndatýda.
Polıtsııa departamentiniń bastyǵy Janat Súleımenov qylmystyń ashylý deńgeıi joǵarylaǵanyn basa aıtty. Shóldala massıvinde polıtsııa tirek pýnkti qurylyp, onyń shtaty tájirıbeli ofıtserlermen kúsheıtilgen.
«Ásirese Moıynqum aımaǵyndaǵy zańsyz kenshilerdi anyqtaý jumystaryn kúsheıtý kerek. Baǵaly metaldar kontrabandasyna nyq tosqaýyl qoıylýy qajet», - dedi oblys ákimi.
QR Bas prokýratýrasynyń quqyqtyq statıstıka jáne arnaıy esepke alý jónindegi komıtetiniń basqarma basshysy Dáýren Raıymqulov aıyppuldardy óndirý jáne ákimshilik quqyq buzýshylyqtardyń biryńǵaı tizilimi týraly basa aıtty.