Jambyl oblysynda ákesin saǵynǵan eki bala eshkimge aıtpaı poıyzben sapar shekken
29 tamyz kúni 22.40 shamasynda kólik polıtsııasyna 53 jastaǵy malshy habarlasqan. Ol «Tamdy - Talas» ótkelinde júk poıyzynyń vagondarynan eki kishkentaı balany baıqap qalǵanyn jetkizgen.
Habar túsken soń kólik polıtseıleri birden izdeý jumysyna kirisken.
Olar 40 mınýtta Bılikól aýyly mańynan 9 jasar balany tapty, al onyń 7 jasar baýyry Juma stansasyndaǵy temirjoldyń boıynda jatyr eken.
Balalar Talas aýdanynyń ortalyq aýrýhanasyna jatqyzyldy.
Keıin anyqtalǵany - balalar Qarataý qalasynda anasymen birge turady. 29 tamyz kúni olar Tamdy aýylynda ájesiniń úıinde bolǵan.
Qaraýsyz qalǵan ekeýi kórshi aýylda turatyn ákesine barmaq bolady. Ata-anasy ajyrasyp ketken. Sóıtip olar Tamdy stansasynda júk poıyzynyń sońǵy vagonyna minip úlgergen.
Jolda poıyz jyldamdyǵyn údetkende qoryqqan balalar Juma stansasy mańynda vagonnan sekirip ketken.
Osy fakti boıynsha Qylmystyq kodekstiń 344-baby 1-bólimimen is qozǵaldy.