Jambyl oblysynda aq jaýlyqty ájeler baıqaýy ótti
TARAZ. QazAqparat – Jambyl oblysynda Elbasynyń «Bolashaqqa baǵdar: rýhanı jańǵyrý» baǵdarlamasy aıasynda jáne óńirdiń 80 jyldyq merekesine oraı «Men - ájemin urpaǵyn áldılegen» atty ájeler baıqaýy ótti, dep habarlaıdy QazAqparat.
Qala ákimdiginiń qoldaýymen jáne qalalyq ardagerler keńesiniń uıymdastyrýymen ótken sharany Jambyl oblysy basshysynyń orynbasary Sulýshash Qurmanbekova ashyp, úmitkerlerge sáttilik tiledi. Ulttyq qundylyqtardy, salt-dástúrdi nasıhattaý maqsatynda ótken ájeler saıysy 5 kezeńnen turdy.
Alǵashqyda «Men - ájemin urpaǵyn áldılegen» taqyrybynda tanystyrý kezeńi ótti. Munda ájelerdiń biri úkili dombyramen top jaryp, arnaý aıtsa, endi biri óz ómirinen kórinis qoıyp, kórermenniń kóńilin qýantty. Ekinshi kezeń boıynsha «Ájeniń altyn qorjyny» saıysynda qatysýshylar qazirgi zaman taqyryptarynda suraqtarǵa jaýap berdi, maqal-mátel aıtyp, bataǵa taldaý jasady. Odan keıin «Ónerli órge júzedi» kezeńinde óz ónerlerimen kózge túsýge tyrysyp baqty. Aq ájeler án salyp, kúı shertti. Túrli obrazdardy somdap, jyrdan shashý shashty.
«Ata mura – asyl qazyna» básekesinde analar óz qolynan shyqqan qolóner buıymdaryn ortaǵa saldy. Biri quraq qurap, oıý oısa, endi biri toqyma, áshekeı buıymdaryn kórsetti. Sońǵy kezeń – úı tapsyrmasy «Qonaqjaılylyq – ata dástúrimiz» dep ataldy. Munda qazaqtyń ulttyq taǵamdary – qurt, irimshik, maı, jent, qazy-qarta, jal-jaıa da dastarqanǵa qoıyldy.
Saıys sońynda kórermenniń kózaıymyna aınalǵan Aıman Qaraýlova «Súıkimdi áje», meıirimin tókken Senimgúl Jeksenbaeva «Meıirban áje», syry ketse de, syny ketpegen Kúljámıla Joldasova «Kerbez sándi áje», otbasynyń berekesi Nurzada Mahambetova «Qazyna áje», úırenýden jalyqpaǵan, úıretýden aıanbaǵan Aıgúl Qabıeva «Parasatty áje», besik jyryn tógiltken Gúlnár Esenǵalıeva «Ónerli áje», altyn oımaqty Aınash Tasmaǵambetova «Sheber áje» atandy.
«Osyndaı sharalar jıi ótkizilip turǵany durys. Óıtkeni qazynaly qarttardyń ótkeni búgingi urpaqqa ónege, úlgi. Al, ondaı ǵıbratty ǵumyr ıelerin nasıhattaý arqyly biz ulttyq bolmysymyzdy sabaqtastyqqa ulastyra alamyz. Bul sharadan jylymyqty sezine aldyq», - deıli qazynaly áje atanǵan Nurzada Mahambetova.
