Jambyl oblysynda adam urlap aqsha talap etpek bolǵandardyń aılasy iske asqan joq
ASTANA. Jeltoqsannyń 7-si. QazAqparat /Aıdar Ospanalıev/ - Jambyl oblysynda adam urlap aqsha talap etpek bolǵandardyń aılasy iske aspaı qaldy.
Bul oqıǵa jóninde búgin jýrnalıstermen bolǵan aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanysh Jumanov málim etti, dep habarlaıdy QazAqparat.
Onyń aıtýynsha, oqıǵa qarashanyń 25-i kúni oryn alǵan. Taraz qalasynyń áıel azamaty oblystyq Іshki ister departamentine kelip, qaladaǵy meıramhanalardyń biriniń dırektory bolyp qyzmet etetin kúıeýiniń jumystan qaıtyp oralmaǵanyna shaǵymdanǵan. Al qarashanyń 29-y kúni qaraqshylar oǵan telefon shalyp, 300 myń AQSh dollaryn ákelgen jaǵdaıda kúıeýin bosatatyndyqtaryn aıtqan. «Osy iske baılanysty júrgizilgen arnaıy izdestirý sharalarynyń barysynda qala mańynan atalmysh qylmysqa qatysy bolýy múmkin kúdikti qolǵa tústi. Ol urlanǵan azamatty kúzetip júrgen. Qylmysqa qatystylyǵy dáleldengen soń atalǵan azamat bar kinásin moıyndap, bolǵan jaıtty tártip saqshylarynyń aldyna jaıyp saldy. Qylmyskerler azamatty aqsha talap etý úshin urlaǵan bolyp shyqty. Tap osy kúni urlanǵan azamat qamaýdan bosatyldy, al ony urlaýǵa qatysqandar izdestirilýde», dedi Q.Jumanov.
