Jambyl oblysynda «Adal júrek» qaıyrymdylyq sharalary ótti

TARAZ. QazAqparat – Tarazda salaýatty ómir saltyn saqtaý, adaldyq pen parasattylyqty nasıhattaý maqsatynda «Adal júrek» respýblıkalyq aktsııasy ótti, dep habarlaıdy QazAqparat tilshisi.

Aktsııa sheńberinde marafon jáne qan tapsyrý sharasy ótti.

Marafonǵa jambyldyq memlekettik qyzmetshiler men quqyqqorǵaý organdarynyń mamandary qatysty. 600-ge jýyq azamat «Dostyq» alańynan «Tuńǵysh Prezıdent» saıabaǵyna deıin 2400 shaqyrymǵa júgirip ótti. Qatysýshylardyń erikti túrde tólegen jarnalaryna jaǵdaıy tómen otbasylarǵa qarjylaı demeýshilik kórsetildi.

Sharanyń ashylý saltanatynda sóz alǵan oblys ákiminiń birinshi orynbasary Bekbolat Orynbekov salýatty ómir saltyn saqtap, qaıyrymdylyq jasaý úshin uran sózden góri, osyndaı naqty ister kerektigin aıryqsha aıtyp ótti.

Uıymdastyrýshylar aktsııa aldaǵy ýaqytta oblys turǵyndary arasynda dástúrli ıgi iske aınalatynyn jetkizdi. Belsendi qatysyp, júzden júırik atanǵandar arnaıy dıplommen marapattaldy.

Sondaı-aq, «Adal júrek» respýblıkalyq aktsııasy aıasynda 200-ge jýyq azamat «Ómir syıla» bastamasymen donor atanyp, qaladaǵy «Qan ortalyǵynyń» qyzmetkerleriniń qoldaýymen qan tapsyrdy.