Jambyl oblysynda 96 jastaǵy ájeı vaktsına aldy
TARAZ. QazAqparat – Jambyl oblysynda 96 jastaǵy qart koronavırýsqa qarsy ekpe aldy,- dep habarlaıdy QazAqparat tilshisi.
Jambyl oblysy Shý aýdanynyń Jańa jol aýylynyń turǵyny Halaıapova Ifrat – Ekinshi dúnıejúzilik soǵys jyldarynda tylda aıanbaı eńbek etip, jeńisti jaqyndatýǵa barynsha úles qosqandardyń biri. El basyna kún týǵan shaqta erlershe eńbek maıdanynda ter tókken qart 8 balany týyp, onyń 6-ýyn ósirip-tárbıelep, olardan 13 nemere kórip otyr.
Soǵystan keıingi jyldary zvenoda Ifrat apa qyzylsha egý, baptaý jumystarynda da aldyna jan salmaǵan.
Qashanda shıraq qarııa eshqashan aýyldyq emhanaǵa syrqaty jóninde shaǵymdanbapty. Sozylmaly nemese basqa da aýrýlar boıynsha dıspanserlik esepte de joq. Búkil ǵumyryn eńbekke arnaǵan jan únemi qımyl-qozǵalysta bolyp, salaýatty ómir saltyn ustanǵanynyń arqasynda áli de ózin tyń sezinetinin aıtady.
«Men koronavırýsqa qarsy vaktsına salǵyzyp, aýrýdan saqtanýǵa bel býdym, sondaı-aq ózgelerge de zııanymdy tıgizbeý úshin de vaktsına salǵyzdym», - deıdi ájeı.
