Jambyl oblysynda 953 páter paıdalanýǵa berilmek
JAMBYL. QazAqparat - Jambyl oblysy ákimdiginde óńir basshysy Asqar Myrzaxmetovtiń tóraǵalyǵymen "7-20-25" memlekettik baǵdarlamasy aıasynda júzege asyrylyp jatqan jumystar jóninde jınalys ótti, dep habarlaıdy óńir basshysynyń baspasóz qyzmeti.
Qazirgi tańda oblysta 23258 adam turǵyn úı kezeginde tur. Onyń ishinde soǵys ardageri - 4, jetim jáne qamqorlyqsyz qalǵan balalar - 2737, xalyqtyń áleýmettik osal toby - 13170, bıýdjettik sala qyzmetkerleri - 7345, úıi apatty dep tanylǵan - 2 adam. Bul kórsetkish jyl basynda 21683 adamdy qurasa, osy ýaqytqa deıin 1372 adam taǵy kezekke tirkelgen. ıAǵnı kezekke turǵandardyń ósim dınamıkasy qarqyndy.
Kezekke turǵandardy turǵyn úımen qamtý - mańyzdy másele desek, aǵymdaǵy jyly 953 páter paıdalanýǵa beriledi dep josparlanǵan. Al 2019 jyly - 1380, 2020 jyly - 1600 páterli kópqabatty turǵyn úıler salynýy kózdelýde.
Búgingi málimetke súıensek paıdalanýǵa berýge 606 páter daıyn. Onyń 114-i Araı shaǵyn aýdanynda tıesili. Asqar Isabekuly bul úılerdi "7-20-25" baǵdarlamasy arqyly paıdalanýǵa berý kerektigin aldyǵa tartty. Bul baǵytta ótinish berýshilerdiń alǵashqy 20 paıyzynyń 10 paıyzyn tólep berýge jergilikti bıýdjetten 400 mıllıondaı qarjy qarastyrý kózdelýde. Bul qarjy paıyzsyz bólip tóleý júıesimen úlestirilmek. Ol úshin arnaıy tizim jasalynatyn bolady. Bul turǵydaǵy jumystar qazir pysyqtalý ústinde.
Óńir basshysy arendalyq kezekte turǵandardy kredıttik baǵyt boıynsha páter alýǵa yńǵaılaý, ol úshin taldaý-saraptaý jumystaryn atqarý kerektigin eskertti. Asqar Isabekuly oblys ekonomıkasyn arttyrý úshin turǵyn úı qurylysynyń qarqynyn beseńdetpeýdiń mańyzdylyǵyn basa aıtyp, jaýapty tulǵalarǵa atalmysh baǵdarlama aıasynda baspana baqytyna ıe bolýshylardyń sanyn arttyrý jolynda naqty jumystar júrgizýdi tapsyrdy.
