Jambyl oblysynda 91 nysannan 53 mlrd teńgeniń zańbuzýshylyqtary anyqtaldy
TARAZ. QazAqparat – Jambyl oblysynda aǵymdaǵy jyly 91 nysanǵa aýdıttik tekserý júrgizilgen. Onyń ishinde 74 nysannan 53 mlrd. 729 mln. 800 myń teńgeni quraıtyn zańbuzýshylyq anyqtalyp otyr, - dep habarlaıdy QazAqparat tilshisi.
Osy jáne ózge de máseleler týraly óńirlik kommýnıkatsııalar qyzmetiniń alańynda ótken brıfıng barysynda Jambyl oblysy boıynsha ishki memlekettik aýdıt departamentiniń basshysy Almas Dúısenbaev baıandady.
«Aýdıtorlyq is-sharalar nátıjesi boıynsha 74 nysanda jalpy somasy 53 729,8 mln teńgeni quraıtyn buzýshylyqtar anyqtalǵan. Onyń ishinde: 7 927,6 mln teńge qarjylyq buzýshylyqtar, 45 802,2 mln teńge rásimdik sıpattaǵy buzýshylyqtar. Qoldanylǵan sharalar arqyly 7 233,8 mln teńge bıýdjetke qaıtarylyp, qalpyna keltirildi, ıaǵnı ornyn toltyrý 91,2 paıyzdy qurap otyr»,-dedi A.Dúısenaev.
Sondaı-aq, spıker júrgizilgen is-sharalar qorytyndysy boıynsha anyqtalǵan buzýshylyqtar úshin 37 laýazymdy tulǵa tártiptik jazaǵa tartylǵanyn aıtty. Olar oblystaǵy túrli mekeme jáne kásiporyn basshylary sanalady.
Aıta keteıik, atalǵan ýákiletti organ memlekettik mekemelerdiń qarjylyq esepteri men ózge de bıýdjettik baǵdarlamalar boıynsha jyl saıyn aýdıt júrgizedi. Ári respýblıkalyq jáne jergilikti bıýdjet qarajatynyń tıimdi jumsalýyn jiti tekseredi.
