Jambyl oblysynda 90 otbasy elordanyń mereıtoıyn jańa páterde qarsy alady
TARAZ. QazAqparat - Jambyl oblysynda «Astananyń 20 jyldyǵyna - 20 nysan» respýblıkalyq aktsııasy jalǵasyp jatyr, dep habarlaıdy «QazAqparat» HAA tilshisi óńir ákiminiń baspasóz qyzmetine silteme jasap.
Elordanyń mereıtoıy qarsańynda Jambyl aýdany Asa aýyly men Talas aýdany Qarataý qalasynyń turǵyndary qonys toıyn toılady.
18 páteri bar úsh qabatty jańa turǵyn úı Jambyl aýdany Asa aýylynda «Báıterek» turǵyn úı alabynda paıdalanýǵa berildi. Turǵyn úı zamanaýı talaptarǵa saı «Nurly jer» memlekettik baǵdarlamasy aıasynda salyndy. Qurylys barysynda negizinen otandyq materıaldar qoldanyldy. Páterlerdi jetim, ekinshi toptaǵy múgedek balalar, kóp balaly jáne az qamtylǵan otbasylar, sondaı-aq bıýdjettik sala qyzmetkerleri aldy.
70 páterli kópqabatty turǵyn úı Talas aýdany Qarataý qalasynyń 5-shi shaǵyn aýdanynda qaıta quryldy. Qaıta qurylymdaý quny - 226,8 mln teńge.
Eske salaıyq, Astananyń 20 jyldyǵyna oraı Jambyl oblysynda paıda bolatyn 20 nysannyń ishinde segiz balabaqsha, tórt sporttyq-saýyqtyrý kesheni, «Burnoye Solar-2» JShS kún elektr stansasynyń ekinshi kezegi, as tuzyn óndiretin jáne óńdeıtin zaýyt, aýyldyq tarıhı mýzeı, dárigerlik ambýlatorııa, aýyl sharýashylyǵy kooperatıvi, jańa 70 páterli kóp qabatty turǵyn úı bar.
