Jambyl oblysynda 9 nysanda seısmokúsheıtý jumystary júrgizilýde

ASTANA. QazAqparat - Jambyl oblysynda 8 bilim berý jáne bir densaýlyq saqtaý men mádenı nysanynda seısmokúsheıtý jumystary júrgizilýde. Bul týraly óńirlik kommýnıkatsııalar qyzmetinde ótken brıfıng barysynda Jambyl oblysy Tótenshe jaǵdaılar departamentiniń TJ aldyn alý bóliminiń bastyǵy Omar Bekbolatuly Takeev málimdedi.

Omar Bekbolatulynyń aıtýynsha, Jambyl oblysy 8 baldyq seısmıkalyq aımaqta ornalasqan. Oblystyń jalpy aýmaǵynyń 22% seısmoqaýipti aýmaq bolyp sanalyp, ondaǵy 70 % halyq bolsa, 85 % óndiristik potentsıal sonymen qatar, negizgi transporttyq magıstraldary ornalasqan.

Oblys aýmaǵynda kúshi 7-8 baldyq qıratqysh jer silkinisine Taraz qalasy jáne 8 aýyldyq aýdandary (Jambyl, Jýaly, Baızaq, Merki, T.Rysqulov, Qordaı, Shý jáne Talas) ushyraýy múmkin. Kúshtiligi 2-3 baldyq jer silkinisi jylyna 2-5 ret qaıtalanady. Sonymen qatar, oblys aýmaǵynda kúshtiligi 7-8 baldyq jer silkinisi 1971 jyly Jambyl jáne 2003 jyly T.Rysqulov aýdandarynda tirkelgen.

Oblysta 2011-2018 jyldary ǵımarattar men qurylymdardy seısmoturaqtandyrý baǵdarlamasy qabyldanǵan. Atalǵan baǵdarlamada asa qaýipti densaýlyq saqtaý jáne bilim berý nysandaryn seısmokúsheıtýi qarastyrylǵan.

2010 jyldan 2015 jyl aralyǵynda oblys aýmaǵynda 55 turǵyn úı, 31 bilim berý nysany, 6 densaýlyq saqtaý nysany, 15 mádenı nysan jáne 2 óndiristik ǵımarattar seısmokúshetildi.

Omar Bekbolatulynyń málimdeýinshe, oblysta 35 mektep salyndy, onyń 27-i apatty mektepterdiń orny salyndy (2 mekteptiń qurylysy 2016 jyldyń sońyna deıin aıaqtalady). Qurylys jumystarynda seısmoturaqtylyǵy qarastyrylyp júrgizilýde.

Oblys aýmaǵynda joıqyn jer silkinisinen shyǵyndy azaıtý maqsatynda birqatar jumystar júrgizilýde. «QazNIISA» aktsıonerlik qoǵamynyń fılıaly jáne basqa jobalyq mekemeler birlesip, 2015 jyly 21 seısmoqaýipti nysandarǵa zerdelý jumystaryn júrgizip, olardyń seısmokúsheıtýge jobalyq qujattary daıyndaldy.

Qazirgi tańda oblysta 8 bilim berý nysandarynda jáne bir densaýlyq saqtaýmen mádenı (oblystyq murajaı) nysandarynda seısmokúsheıtý jumystary júrgizilýde.

Oblys aýmaǵynda 300-deı ǵımarattar seısmokúsheıtýdi talap etedi, onyń ishinde 26 bilim berý nysandary (19 mektep, 5-balabaqsha, 2- kolledj) jáne 6 densaýlyq saqtaý nysandary (6 aýrýhana).