Jambyl oblysynda 80 jastaǵy azamat koronavırýs juqtyrdy
NUR-SULTAN. QazAqparat –Búgin saǵat 18:00-degi jaǵdaı boıynsha Jambyl oblysynda koronavırýs juqtyrǵan 1 adam anyqtaldy, dep habarlaıdy QazAqparat.
«Vırýsty juqtyrǵan azamat 1940 jyly týǵan oblys ortalyǵynyń turǵyny. Ol qaýiptilik tobyna jatatyn bolǵandyqtan josparly túrde tekserildi. Sebebi bul azamat sozylmaly respıratorlyq aýrýmen aýyrady. Júrgizilgen zerthanalyq taldaý nátıjesi onyń vırýsty juqtyrǵanyn kórsetti, sodan keıin naýqas juqpaly aýrýlar aýrýhanasyna jiberildi»,-delingen Tótenshe jaǵdaı rejımin qamtamasyz etý jónindegi Memlekettik komıssııanyń jedel shtabynyń aqparatynda.
Úı oshaǵynan baılanys jasaǵan tórt tulǵa anyqtalyp, barlyǵy karantınge jatqyzyldy, dezınfektsııa sharalary júrgizildi.
Jalpy, 6 mamyrdaǵy jaǵdaı boıynsha Jambyl oblysynda koronavırýs ınfektsııasyn 163 adam juqtyrǵan. Olardyń 55-i jazylyp shyǵyp, dárigerlerdiń baqylaýynda úı karantıni rejımin saqtap otyr.
