Jambyl oblysynda 70-ke jýyq adamdy qutqarǵan aýyl ákimi marapattaldy

TARAZ. QazAqparat – Memlekettik qyzmetshiniń sheshýshi áreketiniń arqasynda jolda qalǵan 70-ke jýyq azamat qutqaryldy, dep habarlaıdy QazAqparat Memlekettik qyzmet isteri agenttiginiń resmı saıtyna silteme jasap.

Jambyl oblysy Talas aýdany Berikqara aýyldyq okrýginiń ákimi Erbol Smaılov Memlekettik qyzmet isteri agenttiginiń tóraǵasy Darhan Jazyqbaevtyń Alǵys hatymen marapattaldy.

10-11 aqpanda qatty boran soǵyp, Berikqara aýyldyq okrýgine qarasty Maıtóbe aýylynyń mańyndaǵy Taraz - Qarataý tasjolynda shamamen 35 avtokólik pen 70 jolaýshy qar qursaýynda qalǵan. Aýyldyq okrýg basshysy ákimdik qyzmetkerleriniń jumysyn joǵary deńgeıde uıymdastyryp, qutqarý jumystaryn tıimdi júrgizgen.

Atap aıtqanda, Qarataý - Taraz avtomagıstraliniń boıynda qasynda eki nemeresi bar aýyl turǵynynyń jolda qalǵany týraly habarlama túsedi. Olardy qutqarý maqsatynda jolǵa shyqqan aýyldyq okrýg ákiminiń qyzmettik kóligi de qar astynda qalady. Alaıda, Erbol Smaılov eki nemeresimen jolda qalǵan azamatty jaıaý izdep júrip tapqan. Koordınatty okrýg apparatynyń qyzmetkerlerine uıaly telefon arqyly jetkizip, ákimdik qyzmetshileri tez arada arnaıy tehnıka uıymdastyrady da, jolda qalǵan azamattardy qaýipsiz jerge jetkizedi.

Tótenshe jaǵdaılar qyzmetkerleri kelgenshe aýyldyq okrýg ákimi jolda qalǵan ózge azamattardy óz kúshimen izdestirýdi jalǵastyryp, jol ústinde túnegen. Osy ýaqytta okrýg ákimdiginiń qyzmetkerleri borannan aman qalǵan azamattardy aýyl meshiti men orta mektepke ýaqytsha ornalastyrý jumystarymen aınalysady. Tańda tótenshe jaǵdaılar bóliminiń arnaıy avtokóligimen aýylǵa jetkizilgen ákim, aldymen qar qursaýynan qutqarylǵan azamattarmen kezdesip, olardy ystyq shaı, tamaq jáne t.b. kerek-jaraqpen qamtamasyz etedi.

Osylaısha, jolda qalǵan 70-ke jýyq azamat qutqarylyp, olarǵa alǵashqy kómek kórsetilgen. Okrýg ákimdigi men tótenshe jaǵdaılar qyzmetkerleri jáne de aýyl turǵyndarynyń arqasynda 35 shaqty avtokólik jol jıegine shyǵarylyp, ıelerine tapsyryldy.

QR MQІA tóraǵasy joldaǵan Alǵys hatty Jambyl oblysy boıynsha aýmaqtyq departament basshysy, Ádep jónindegi keńes tóraǵasy Lesbek Ilebaev tabystady.

Aıta ketsek, Erbol Smaılov Jambyl oblysynda dúnıege kelgen. Memlekettik qyzmette 8 jyl eńbek ótili bar. Búginde úsh ul men bir qyz tárbıelep otyr.

Foto: gov.kz