Jambyl oblysynda 7 myńnnan asa adam obyr dertimen esepte tur
TARAZ. QazAqparat - Jambyl oblysynda 7194 adam qaterli isikpen esepte tur. Bul týraly Óńirlik kommýnıkatsııalar qyzmetinde ótken brıfıngte oblystyq onkologııalyq dıspanserdiń bas dárigeri Abaı Nurjanov málimdedi, dep habarlaıdy QazAqparat.
Ótken jyly 1582 adamnan alǵash ret obyr derti anyqtalǵan. Bul kórsetkish 2017 jyly 1596 adamdy quraǵan. Bul dert boıynsha ólim kórsetkishine kelsek, oblys boıynsha byltyr 813 aýrý qaıtys bolsa, 2017 jyly 950 adam ajal qushqan. Tıisinshe, ólim kórsetkishiniń tómendegeni baıqalady. Bul oraıda qaterli isikti erte anyqtaý, ýaqtyly emdeý jumysy jaqsaryp keledi degendi alǵa tarqan bas dáriger 2016-2019 jyldarǵa arnalǵan «Densaýlyq» baǵdarlamasy boıynsha ólim kórsetkishiniń ındıkatory 74,35 bolyp bekitilgenin jetkizdi.
«Óńirimizde qaterli isikpen alǵash ret aýyrǵan 1582 adamnyń 59,5 paıyzy syrqattyń I jáne II satysynda ekeni anyqtaldy. Demek, osynsha naýqastyń qajetti emdi ýaqtyly alsa, jazylyp ketý múmkindigi joǵary degen sóz. Jalpy, qaterli isikten bolatyn ólim-jitim kórsetkishin tómendetý úshin aýrýdy aldyn alý jáne aýrýdy erte satyda anyqtaý qajet»,- deıdi Abaı Nurjanov.
Aıta keteıik, 1-10 aqpan aralyǵynda respýblıkanyń barlyq óńirinde Dúnıejúzilik obyrǵa qarsy kúres kúnine arnalǵan onkologııalyq aýrýlardyń aldyn alý men erte anyqtaý týraly onkúndik ótýde.
