Jambyl oblysynda 7 birdeı kólik soqtyǵysyp, 3 adam aýrýhanaǵa tústi
TARAZ. QazAqparat - Jambyl oblysy Jýaly aýdanynda iri jol-kólik oqıǵasy oryn aldy, dep habarlaıdy QazAqparat.
Atalmysh jol kólik oqıǵasynyń kýágerler túsirip alǵan beınejazbasy «WhansApp» mesendjerinde tarap ketken bolatyn. Beınejazbadan baıqaǵanymyzdaı, oqıǵaǵa qalyń tuman sebep bolǵan. Bul týraly oblystyq polıtsııa departamentiniń baspasóz qyzmeti de málimdeme jasap úlgerdi.
«2019 jyldyń 1 aqpany kúni saǵat 17:10 shamasynda "Batys Eýropa - Batys Qytaı" tas jolynyń 552-shaqyrymynda qalyń tumannyń saldarynan bir baǵytta bet alǵan jeti kólik apatqa ushyrady. Saldarynan, Jýaly aýdandyq ortalyq aýrýhanasyna bir adam, Taraz qalalyq №1 aýrýhanasyna eki adam jatqyzyldy, qaza bolǵandar joq», - deıdi oblystyq PD-niń baspasóz hatshysy Gúlsara Muhtarqulova.
Quzyrly organnyń málimetinshe, atalǵan derek boıynsha jol qozǵalysy erejesin buzǵan júrgizýshilerge qatysty QR Ákimshilik quqyq buzýshylyq týraly kodekstiń 610-baby 1, 2-bólikteri boıynsha hattama toltyrylyp, barlyq jeti kólik quraly aıypturaqqa qoıylǵan.
Qazirgi ýaqytta saraptama taǵaıyndalyp, tergep-tekserý jumystary júrgizilýde.
