Jambyl oblysynda 7 adamdy úsik shaldy
ASTANA. QazAqparat - Aıazdy kúnderi Jambyl oblysynda úsik shalǵan 7 adam densaýlyq saqtaý mekemelerine jetkizildi, dep habarlaıdy QazAqparat.
Oblystyq jedel medıtsınalyq kómek stansasynyń bas dárigeri Venera Balqybekovanyń atap ótýinshe, qańtardyń 20-synan bastap búgingi kúnge deıin óńirde aıaz kúsheıip tur. Sonyń saldarynan zardap shekken segiz adam jedel járdem kóligimen medıtsınalyq mekemelerge jetkizilgen.
«Úsigen adamdardyń barlyǵy mas kúıde bolǵan. Aınalasyna beı-jaı qaramaıtyn adamdar aıazda dalada jatqan adamdy kórgennen keıin jedel járdem kóligin shaqyrady. Bireýleri aýlada, endi biri úıdiń janynan, taǵy bir Komsomolskıı kólik aýdanynan tabyldy. Aıaǵyn úsitip alǵan endi biri Asqarov kóshesi boıyndaǵy úısiz-kúısiz adamdarǵa arnalǵan ýaqytsha qabyldaý mekemesi janynda jatqan. Tek ishimdik ishpegen bir áıel ǵana muzǵa taıyp qulap, ernin jaraqattap alǵan», - dedi Venera Balqybekova.
Jedel járdemmen aýrýhanaǵa jetkizilgen jeti adamǵa da «ishimdikke masaıý, aǵzaǵa jalpy sýyq tııý» dıagnozy qoıylǵan. Olardyń jastary 19-dan 55-ke deıin.
Aıta keterligi, Jambyl oblysynda kún raıyna baılanysty bıyl alǵash ret óńirdiń qarly ári sýyq aýdandarynyń biri bolyp sanalatyn Moıynqum mektepterinde sabaq toqtatyldy. Óńirde alǵash ret aýa temperatýrasy mınýs otyz gradýsqa jýyqtady.
«Qazgıdromet» RMK fılıaly qańtar aıynyń sońynda Taraz ben Jambyl oblystarynda qatty sýyq bolatyndyǵyn boljaǵan edi. Aıazdyń sharyqtaý shegi 26-27 qańtarǵa týra kelip, 29-30 qańtarǵa deıin jalǵasady.
