Jambyl oblysynda 650-ge jýyq bıznes nysany jumysyn qaıta bastady
TARAZ. QazAqparat – Jambyl oblysynda karantındik rejımdi jeńildetýdiń ekinshi kezeńi boıynsha 650-ge jýyq bıznes nysany jumysyn qaıta bastaıdy. Bul týraly óńir ákimi Berdibek Saparbaevtyń tóraǵalyǵymen ótken óńirlik jedel shtabtyń kezekti otyrysynda málim boldy, dep habarlaıdy QazAqparat.
Aldyn ala málimet boıynsha, 11 mamyrdan bastap Jambyl oblysynda shamamen 650 bıznes nysany ashyldy, onda 6500-den astam adam jumys isteıdi.
«Eń bastysy – adamdardyń densaýlyǵy. Karantındik rejımdi jeńildetý sanıtarlyq-epıdemıologııalyq talaptardyń saqtalýyna, koronavırýs ınfektsııasyn taratpaý jónindegi qaýipsizdik sharalarynyń sapasyna esh áser etpeýi kerek», - dedi oblys basshysy.
Sondaı-aq, ol pandemııadan alǵan sabaqtardy aldaǵy ýaqytta da keńinen qoldaný qajettigin atap ótti. Bul, eń aldymen, barlyq sala boıynsha tsıfrlyq tehnologııalardy damytýǵa, onlaın rejıminde jumys isteýge, qashyqtan oqytýǵa, ónimderdi jetkizýge jáne taǵy basqalarǵa qatysty ekendigi aıtyldy.
«Kásiporyndar óz jumysyn kezeń-kezeńimen bastaıdy, al basty mindet – áleýmettik-ekonomıkalyq kórsetkishterdiń tómendeýiniń aldyn alý. Prezıdenttiń ekonomıkanyń jańa qurylymy týraly tapsyrmasyna sáıkes energııanyń balama kózderin engizý qarqynyn jedeldetip, ınvestorlardyń múmkindikterin keńinen paıdalaný qajet. Árbir nysannyń jeke damý jospary bolýy kerek. «Atameken» palatasymen, tıisti mınıstrliktermen tyǵyz baılanysta jumys jasap, aımaqtyq ekonomıkany damytý úshin jańa jobalardy qolǵa alǵan abzal», - dedi oblys ákimi Berdibek Saparbaev.
