Jambyl oblysynda 600 myńǵa jýyq turǵynǵa vaktsına salynady
TARAZ. QazAqparat – Jambyl oblysynda koronavırýspen kúres sharalaryna 5 mıllıardtan astam teńge bólindi.
Aımaq basshysy Berdibek Saparbaev halyqqa esep berý kezdesýinde qaralǵan bıýdjet qarajaty qaıda baǵyttalǵanyn aıtyp berdi, dep habarlaıdy QazAqparat tilshisi.
Qarjylyq qoldaýdyń arqasynda densaýlyq saqtaý salasynyń materıaldyq-tehnıkalyq bazasyn edáýir jaqsartýǵa múmkindik týdy. Atap aıtsaq, 208 dana qajetti medıtsınalyq jabdyq satyp alyndy. Nátıjesinde medıtsınalyq mekemelerdiń tehnıkamen jáne buıymdarmen jabdyqtalý deńgeıi 15 paıyzǵa artyp, 85,9 paıyzdy qurady.
Memleket basshysy Qasym-Jomart Toqaevtyń tapsyrmasyna sáıkes 8 mobıldi emhana satyp alyndy, bul dárigerlerdiń naýqastarǵa kelýin jedeldetýge, aýyldyq jerlerdegi medıtsınalyq kómektiń sapasyn jaqsartýǵa múmkindik beredi.
Koronavırýspen kúreske tartylǵan 4 myńǵa jýyq medıtsına qyzmetkerine jalpy somasy 3,4 mıllıard teńge ústemaqy tólendi.
4,5 myń orynǵa arnalǵan tósek orny daıyndaldy. Taraz qalasyndaǵy qalalyq perınataldyq ortalyq pen T.Rysqulov aýdanyndaǵy ókpe aýrýlary dıspanseri ınfektsııalyq aýrýhana bolyp qaıta jasaqtaldy.
Turaqtandyrý qory 730 mıllıon teńgege dári-dármekter men medıtsınalyq maqsattaǵy buıymdardyń eki aılyq rezervin qalyptastyrdy.
«Ótken jyly Tarazda koronavırýs ınfektsııamen aýyrǵan naýqastarǵa arnalǵan 120 tósektik elimizdegi alǵashqy ońaltý ortalyǵy ashyldy. Búgingi kúnge deıin onda 750-ge jýyq adam ońaltý kýrsynan ótti desek, onyń ishinde júzge jýyq medıtsına qyzmetkeri bar», - dep atap ótti oblys ákimi.
Koronavırýsqa qarsy ujymdyq ımmýnıtetti qalyptastyrý úshin vaktsınatsııa sharasymen oblystyń 18 jastan 64 jasqa deıingi 600 myńǵa jýyq turǵynyn qamtý kózdelýde.
«Jaqyn arada Qordaı, Talas jáne T.Rysqulov aýdandary KT-apparattarymen qamtamasyz etiledi, bıyl 200 tósektik onkologııalyq dıspanserdiń qurylysyn aıaqtaý, oblys ortalyǵynda «Meıirim» medıtsınalyq ortalyǵynyń, oblystyq kópbeıindi aýrýhananyń, Baızaq aýdanynda emhananyń jáne Qordaı aýdandyq ortalyq aýrýhananyń qurylysyn bastaý josparlanýda», - dep habarlady Berdibek Saparbaev.
