Jambyl oblysynda 60 myń tonnadan astam azyq-túlik qory bar

TARAZ. QazAqparat – Jambyl oblysynyń azyq-túlik naryǵyndaǵy baǵa turaqty. Qoımalardaǵy 63 myń tonna azyq-túlik qory óńirdiń aı saıynǵy qajettiligin 137,5 paıyzǵa qamtamasyz etýge múmkindik beredi, dep habarlaıdy QazAqparat Jambyl oblysy ákiminiń baspasóz qyzmetine silteme jasap.

Qazirgi tańda qoımalarda saqtalǵan et jáne sút ónimderi oblystyń qajettiligin 39 kúnge, kókónis – 33 kúnge, kúrish jáne qaraqumyq – 25 kúnge, un – 78 kúnge, makaron – 28 kúnge, qant – 50 kúnge, ósimdik maıy – 38 kúnge, basqa da taýarlar qory bir aıdan astam ýaqyt boıy óteýge jetkilikti. Bul týraly oblys ákiminiń baspasóz qyzmeti habarlady.

«Óńirdiń óz qorlaryn únemi jańartyp otyrý úshin áleýeti jetkilikti. Mysaly, kún saıyn óndiriletin et (sıyr eti – 173%, qoı eti – 182%, taýyq eti – 122), sút, nan kólemi qaıta arta túsken. Degenmen, maýsymaralyq kezeńge baılanysty kartop, qyryqqabat jáne qant baǵalarynyń shamaly ósýi baıqalady. Jergilikti óndiris oryndary óńirdiń unǵa degen suranysty 71 paıyzǵa, makaron boıynsha 68 paıyzǵa, jumyrtqaǵa degen suranysty 84 paıyzǵa qanaǵattandyra alady», - delingen habarlamada.

Suranys artqan jaǵdaıda oblys aýmaǵyndaǵy úsh jańa qus fabrıkasy men úsh makaron fabrıkasynyń óndiris kólemin arttyrýǵa múmkindik bar ekendigi aıtylǵan.

Aıta keteıik, búginde óńirde syıymdylyǵy 313,2 myń tonna bolatyn 218 kókónis saqtaý qoımasy jumys isteıdi desek, onyń ishinde 160 kókónis saqtaý qoımasy arnaıy tońazytqyshpen jabdyqtalǵan.

Sondaı-aq, oblys halqynyń aı saıynǵy qajettiligi men turaqtandyrý qorynyń qoımalaryndaǵy azyq-túlik qoryna júrgizilgen monıtorıng nátıjesi boıynsha 1069 tonna azyq-túlik taýaryn qosymsha satyp alý qajettiligi anyqtaldy. Onyń ishinde 319 tonna ósimdik maıy, 67 tonna makaron ónimi, 32 tonna tuz, 115 tonna qaraqumyq, 106 tonna kúrish, 430 tonna taýyq etin satyp alý qajettigi belgili bolǵan. Ol úshin 220 mıllıon teńge kerek.

Barlyq aýdandarda oblys ákiminiń orynbasarlary basqaratyn mobıldik toptar jumys isteıdi. Ol toptar saýda núktelerindegi jáne jergilikti azyq-túlik qoımalaryndaǵy baǵalardy monıtorıngileýmen aınalysady. Bul oraıda oblystyń bes aýdanyn aralap, zerdeleý barysy ondaǵy azyq-túlik naryǵyndaǵy jaǵdaıdyń turaqty ekendigin kórsetti. Degenmen, belgili bir azyq-túlik túrleriniń baǵasynda ósim baıqalǵan. Osyndaı jaǵdaılar aldaǵy ýaqytta oryn almas úshin aldyn alý sharalary qabyldanǵan.

Koronavırýs ınfektsııasynyń taralýyna jol bermeý boıynsha saýda núktelerimen profılaktıkalyq jumystar jalǵasýda.