Jambyl oblysynda 6 myńǵa jýyq medıtsınalyq anyqtama zańsyz berilgen
TARAZ. QazAqparat - Jambyl oblysynda medıtsınalyq anyqtamalardyń saýdalanǵany anyqtaldy, dep habarlaıdy QazAqparat.
Óńirdegi birqatar medıtsınalyq mekemelerdiń qyzmetkerleri anyqtama úshin halyqtan aqsha alyp otyrǵan. Zań boıynsha bul qujatty turǵyndar elektrondy túrde tegin alýy tıis. Naqtylap aıtsaq, narkologııalyq jáne psıhonevrologııalyq dıspanserde tirkeýde turǵan, turmaǵandyǵyn anyqtaıtyn qujat zańsyz berilip kelgen. Bul áreketter atalmysh anyqtamalardyń berilý mehanıziminde sybaılas jemqorlyq táýekelderi barma, joq pa, osy máselerge taldaý jumystaryn júrgizý barysynda anyqtalǵan.
«Merki aýdandyq ortalyq aýrýhanasynan 50 adam anyqtama alyp, 100 myń teńgeden asa aqsha tólepti. Al Turar Rysqulov aýdanynda 117 adamnan 67 myń teńge alynǵan. Jalpy óńirde 6 myńǵa jýyq anyqtama zańsyz berilgendigi belgili boldy. Sondaı-aq áli de 086-formadaǵy medıtsınalyq qujattardy berý kezinde saýdalasý máseleleri baıqalyp jatyr»,-deıdi QR MQІSJQІA Jambyl oblysy boıynsha departament basshysynyń orynbasary Nurlan Erkebaev.
