Jambyl oblysynda 6 adam qumdy dalada adasyp ketti
ASTANA. QazAqparat - Jambyl oblystyq tótenshe jaǵdaılar departamentiniń qyzmetkerleri qumdy dalada adasqan 6 adamdy qutqardy, sonyń úsheýi - bala, dep habarlaıdy QazAqparat.
«1 naýryz kúni túnde Jambyl oblystyq TJD-nyń «112» nómirine Baızaq aýdanynda qumdy aımaqta 6 adam adasyp ketkeni, onyń úsheýi kámeletke tolmaǵan bala ekeni týraly habar keldi. 00:30-da qutqarýshylar «Nıva» kóligimen jolǵa shyqty», - delingen habarlamada.
Adasqandar jaqyn mańda eldi meken bolmaǵandyqtan, ózderiniń qaıda ekenin naqty aıta almaǵan. Onyń ústine qalyń tuman da izdestirý jumystaryn qıyndatty.
Qutqarýshylar olardy tańǵy 4-ke qaraı Baızaq aýdanynyń Aqjar aýylynan 32 shaqyrym jerden tapty. «Golf-2» kóliginiń júrgizýshisi men jolaýshylary uzaq ýaqyt boıy ózderi jol tabýǵa áreket jasaǵan, biraq amaly tabylmaǵan soń kómek shaqyrǵan.
Zardap shegýshiler qaýipsiz jerge jetkizilip, olarǵa saqtyq sharalary eskertildi.
