Jambyl oblysynda 593 700 adamǵa koronavırýsqa qarsy vaktsına salý josparlanǵan
TARAZ. QazAqparat – Jambyl oblysy boıynsha 18-64 jastaǵy 659 722 turǵyn bar. Olardyń ishinde densaýlyq jaǵdaıy vaktsına salýǵa kelmeıtin jáne ekpe jasatýdan bas tartatyndar bar. Osylardy eskere kelgende óńirde 593 700 adamǵa vaktsına salý kózdelip otyr.
Bul týraly búgin Óńirlik kommýnıkatsııalar alańynda alańynda Jambyl oblystyq densaýlyq saqtaý basqarmasynyń basshysy Áset Qalıev málimdedi,- dep habarlaıdy QazAqparat tilshisi.
«Aqpan aıynda birinshi partııamen reseılik «Spýtnık V» vaktsınasymen 5000 turǵyndy, naýryz-maýsym aılary aralyǵynda 95 000 turǵyndy vaktsınalaý josparlanyp otyr. Qalǵan 493 700 oblys turǵynyna otandyq vaktsına egiledi. Vaktsınany engizý úshin kólemi 0,5 ml bolatyn, ózdiginen bekitiletin shprıtsterdiń 1 187 400 danasy qajet», — dedi basqarma basshysy.
Spıkerdiń aıtýynsha, bıyl Jambyl turǵyndaryn vaktsınalaýdan ótkizý úshin, qajetti kólemde dári men shprıtsterdi alýǵa 2,5 mlrd teńge kóleminde qarajat jumsalady dep josparlanýda.
«Oblystyń medıtsına uıymdarynyń qoldanystaǵy egý pýnktteriniń bazasynda KVI-ǵa qarsy vaktsınalaý júrgizý úshin basqarmamen jergilikti bıýdjet qarajaty esebinen kólemi 180 lıtrlik (18-40 gradýs) 20 dana muzdatqysh kamera men 35 termokonteıner satyp alýǵa ótinim berildi. Odan bólek 40 medıtsına qyzmetkeri oqýdan ótti»,-dedi Á. Qalıev.
Aıta keteıik, búginde oblys aýmaǵynda jalpy COVID-19 vırýsyn juqtyrýdyń 5494 jaǵdaıy tirkeldi. Pnevmonııamen 946 adam aýyrǵan. Tirkelgen jaǵdaılardyń ishinde 2 581 naýqas sımptommen, 2 913 naýqas sımptomsyz. Saýyǵyp shyqqan adamdar sany 5 100-den asty. KVI-dan 63 adam kóz jumǵan.
