Jambyl oblysynda 550 myń gektardan astam jer qaıtaryldy
TARAZ. QazAqparat - Jambyl oblysynda paıdalanylmaı jatqan qunarly jerlerdi aýylsharýashylyq aınalymyna qaıta berý isteri júrip jatyr, dep habarlaıdy «QazAqparat» HAA tilishisi.
Oblystyq jer qatynastary basqarmasynyń málimetteri boıynsha sońǵy jyldary paıdalanylmaı jatqan jerler eki esege qysqarǵan: 2009 jyly 141,2 myń ga bolǵan qaraýsyz jer qazir 69,2 myń ga tóńireginde. Bir jylda paıda ákeletin aýylsharýashylyq jerleri 7 myń gektarǵa ulǵaıǵan. Biraq taǵy 43 myń gektar jerdi memlekettik menshikke qaıtarý qajet. Óńirdegi jer zańyn buzýshylyq faktileriniń arasynda jerdi zańsyz paıdalaný jáne jerdi paıdalaný maqsatyn ózgertý jaǵdaılary kóp kezdesedi.
Tekserister 100-ge jýyq jer zańdylyǵyn buzý faktilerin tirkegen, 23 tulǵaǵa jalpy somasy 3,5 mln teńge aıyppul salynyp, 69 sharýashylyqqa paıdalanylmaı jatqan jerlerin aýyl sharýashylyǵy aınalymyna engizý mindetteldi.
«Memleket basshysynyń tapsyrmasyna sáıkes, paıdalanylmaı jatqan aýyl sharýashylyǵy jerleri memleket ıeligine qaıtarylýy tıis, - dedi Jambyl oblysynyń ákimi Kárim Kókirekbaev. - Oblysta sońǵy bes jyl boıy paıdalanylmaǵan 553 myń gektar aýylsharýashylyq jeri anyqtalyp, memleketke qaıtaryldy. Sonyń 182 myń gektary egistik alqaby. Qaıtarylǵan jerdiń 539 myń gektary ekonomıkalyq aınalymǵa berilip, 295 myń gektar aýylsharýashylyq jeri agrarlyq salaǵa ınvestıtsııa tartýǵa daıyndaldy».
Ákim, budan tys, qazirgi kezde kooperatsııalardyń mańyzdylyǵyn atap kórsetti. Onyń sózine qaraǵanda jalǵyz sharýa qarjy jetispeýshiliginiń saldarynan óz ıeliginde jer bolǵanmen, ony tıimdi paıdalana almaıdy. Mundaı jaǵdaıda paıdalanylmaı jatqan jyrtylatyn jerlerdi qysqartýǵa Salyq kodeksine ózgeris engizip, paıdalanylmaıtyn jerler tóleminiń bazalyq stavkasyn arttyrý kómektesýi múmkin.
Jambyl oblysy 14,4 mln gektar jer qoryna ıe. Munyń ishinde aýyl sharýashylyǵyna arnalǵan jerler, eldi mekenderdiń, ınfraqurylym, ónerkásip kásiporyndarynyń aýmaǵy, erekshe qorǵalatyn tabıǵat aýmaqtary, orman jáne sý resýrstary jerleri, sondaı-aq memlekettik qorlar da bar. Aýylsharýashylyq jerleri sonyń 42,7%-in nemese 6,1 mln gektardy quraıdy.
