Jambyl oblysynda 500 gektar orman órtenip jatyr
TARAZ. QazAqparat - Jambyl oblysynyń Qyzylqaınar aýyldyq okrýginde shyqqan órt áli sóndirilip jatyr, dep habarlaıdy QazAqparat tilshisi Jambyl oblysy TJD-nyń baspasóz qyzmetine silteme jasap.
Eske salaıyq, Jambyl aýdanynyń Qyzylqaınar aýylynda «Orman men janýarlar dúnıesin qorǵaý» MM-nyń memlekettik orman qorynyń aýmaǵynda ornalasqan Uzynbulaq shatqalynda qurǵaq shóp pen butalar órtengen edi. Jambyl oblystyq TJD-nyń 86 qyzmetkeri men 8 arnaıy tehnıkasy, orman sharýashylyǵynan 83 qyzmetker men 8 tehnıka, órtke qarsy erikti uıymdardan 75 adam men 12 tehnıka úshinshi táýlik boıy tilsiz jaýmen kúresýde.
Belgili bolǵandaı, órt kórshiles Qyrǵyzstannyń taýly aımaqtarynda bastalyp, Jambyl oblysynyń Jambyl aýdanyndaǵy taýlardyń mańyna qaraı yǵysqan. Taýly jer ári qatty soqqan jel qutqarýshylardyń jumysyna kedergi jasap otyr. Arnaıy tehnıkalar órt bolǵan aımaqqa jetýde qıyndyqtarǵa tap bolýda.
Búgingi tańda Uzynbulaq taýly shatqalynyń 500 gektar aýmaǵyn jalyn sharpyǵan. Órt emdik shópter men butalardy (ıtmuryn, dolana) joıyp jiberdi.
Jambyl oblysy TJD 30 shilde kúni Shý aýdanyndaǵy Qosqudyq «Orman jáne janýarlar dúnıesin qorǵaý jónindegi» MM-nyń aýmaǵynda ornalasqan «Alabota» bólimshesinde taǵy da órt shyqqany týraly jetkizdi. Qansha aýmaq órtke oranǵany anyqtalyp jatyr. Qosqudyq orman sharýashylyǵy mekemesi tilsiz jaýdy aýyzdyqtady.
Vedomstvoda málim etkendeı, órttiń shyǵýyna óńirdegi aptap ystyq aýa raıy sebepshi bolǵan.
