Jambyl oblysynda 484 ýchaskelik saılaý komıssııasy tirkelgen
Bul týraly oblystyq aýmaqtyq saılaý komıssııasynyń tóraǵasy Serǵalı Aıdapkelovtiń aıtyp berdi.
Onyń aıtýynsha, óńirdegi saılaý komıssııalary aldaǵy QR Prezıdentiniń kezekten tys saılaýyna arnalǵan daıyndyq sharalaryn belsendi túrde júrgizýde. Bıyl óńirde 23 jańa ýchaske paıda bolyp, olardyń jalpy sany 484-ke jetken. Naýqan kezinde ýchaskelerde saılaý komıssııalarynyń 3 666 múshesi jumys istemek.
«Qazirgi tańda saılaýǵa daıyndyq barysy qarqyndy júrip jatyr. Saılaý komıssııalarynyń múshelerin oqytý bastaldy, oǵan oblystyq saılaý komıssııasy men memlekettik qyzmet isteri agenttiginiń biliktiligin arttyrý akademııasy atsalysýda. Bul saılaýdyń barlyq kezeńderinde zańdylyqty saqtaý úshin qajet. Azamattardyń ózderiniń konstıtýtsııalyq quqyqtaryn iske asyrý úshin barlyq jaǵdaı jasaý - mańyzdy», - deıdi Serǵalı Aıdapkelov.
Aıta keteıik, jýyrda Taraz qalasynda barlyq saılaý komıssııalarynyń múshelerin saılaý naýqanyna daıyndaý boıynsha arnaıy semınar-trenıng ótip, onda qatysýshylarǵa saılaý úderisine qatysty zańnama normalaryn múltiksiz saqtaý qajettiligi týraly aıtyldy.
«Mańyzdy saıası naýqandy tabysty ótkizý úshin barlyq deńgeıdegi saılaý komıssııalarynyń múshelerin oqytý júrgiziledi. Oqytý is-sharalary úsh kezeńde ótedi. Sondaı-aq, aımaqtyń barlyq ýchaskelik komıssııalarynyń 968 tóraǵasy men hatshysy úshin kóshpeli semınar - keńester uıymdastyrylady», - deıdi Jambyl oblystyq aýmaqtyq saılaý komıssııasynyń tóraǵasy Serǵalı Aıdapkelov.
