Jambyl oblysynda 4 aıda 305 jol apaty boldy

TARAZ. QazAqparat - Jambyl oblysynda jyl basynan beri 4 aıda 305 jol-kólik oqıǵasy tirkelgen. Jol apattarynan 42 adam qaza tapqan, onyń 12 - si balalar. Al 459 azamat túrli dárejede jaraqat alǵan, dep habarlaıdy QazAqparat tilshisi.

«Biz jol-kólik oqıǵalarynyń aldyn alý boıynsha aýqymdy jumystar júrgizip jatyrmyz. Sonyń ishinde «Abaılańyz, balalar!» sekildi jedel-profılaktıkalyq is-sharasyn únemi ótkizip kelemiz.

Kóbinese «Alfard» markaly avtokólik júrgizýshileri jol erejesin jıi buzady. Olar belgilengen jyldamdyqty shekten tys asyryp, saǵatyna 200 kılometr jyldamdyqpen júredi. Al, munyń sońy qaıǵyly jaǵdaıǵa ákelýi ábden múmkin. 4 aıda 305 jol apatynyń bolýy da osyndaı qatelikterden oryn alyp otyr.

Osy oraıda, júrgizýshilerge jol – qatelikti keshirmeıtinin esterine salǵym keledi», – dedi Jambyl oblysy polıtsııa departamenti patrýldik polıtsııa batalony komandıriniń mindetin atqarýshy polıtsııa podpolkovnıgi Dáýlet Janǵabylov.

Aıta keteıik, buǵan deıin Jambyl oblysynyń polıtseıleri jyl basynan beri 210 qarý tárkilegenin jazǵan bolatynbyz.

Onyń 37-si 2022 jyldyń qańtar aıynda polıtsııa departamenti qoımasynan urlanǵan.

Sondaı-aq, osy ýaqyt aralyǵynda 3674 oq-dári alyndy.

Qarý-jaraqtyń negizgi bóligi jasyryn kómilgen oryndardan anyqtaldy.