Jambyl oblysynda 4 aýyl joıylyp, taǵy tórteýi biriktiriledi

TARAZ. QazAqparat – Jambyl oblysynyń Moıynqum aýdanynda halqy túgeldeı kóship ketken 4 eldi meken joıylady. Taǵy 4 eldi meken jaqyn ornalasqan aýyldarǵa qosylady, dep habarlaıdy QazAqparat tilshisi.

Bul týraly búgin Óńirlik kommýnıkatsııa qyzmetinde Jambyl oblysy ákimdiginiń Sáýlet jáne qurylys basqarmasy basshysynyń mindetin atqarýshy Dáýlet Dosanov aıtyp berdi.

«Halqynyń sany 50-ge jýyq 8 eldi meken boıynsha ońtaılandyrý jumystary júrgizilýde. ıAǵnı, Moıynqum aýdanynda 4 eldi meken halyqtyń turmaýyna baılanysty taratylady. Al T.Rysqulov, Sarysý, Shý aýdandaryndaǵy 4 eldi meken jaqyn ornalasqan aýyldarǵa qosylatyn bolady», - deıdi D.Dosanov.

Búginde Moıynqum aýdanyndaǵy tórt eldi mekendi esepten shyǵarý týraly aýdan ákimdiginiń qaýlysy men máslıhattyń birlesken sheshimi shyǵyp, oblys ákimdigi men oblystyq máslıhattyń birlesken sheshimderi qabyldanyp úlgerilgen. Qazir Statıstıka departamentiniń KATO júıesi tiziminen alý jumystary júrgizilýde.

Sondaı-aq, Sarysý aýdanyndaǵy Talas aýylyn Óndiris aýylynyń quramyna qosý, Jarqudyq aýylyn Jańatalap aýylynyń quramyna engizý týraly jáne T.Rysqulov aýdanyndaǵy Razezd-98 aýylyn Aqbulaq aýyldyq okrýgi R.Sabdenov aýylynyń quramyna qosý, Shý aýdanyndaǵy Bóltirik aýylyn Aqtasty eldi mekenine biriktirý týraly oblys ákimdiginiń qaýly jobasy ázirlenip, «Ashyq Úkimet portalyna» qoǵamdyq talqylaýǵa ornalastyrylǵan.