Jambyl oblysynda 39 jastaǵy turǵyn Shý ózenine batyp ketti

ShÝ. QazAqparat - Jambyl oblysy Shý aýdanynda qutqarýshylar sýǵa ketken adamnyń máıitin izdep jatyr, dep habarlaıdy QazAqparat.

8 maýsym saǵat 10.45 kezinde Jambyl oblysy tótenshe jaǵdaılar departamentine Shý aýdany polıtsııa bóliminen habar túsken.

Onda polıtseıler belgisiz jaǵdaıda joǵalyp ketken 1983 jyly týǵan er adamdy Shý ózeniniń sol jaǵalaýyndaǵy arnasy mańynan izdeýge kómek suraǵan.

Óıtkeni sýǵa ketken azamattyń zattary sý jaǵalaýynan tabylǵan.

Shý aýdanynda arnaıy sýdan qutqarý jasaǵy joq.

Sondyqtan saǵat 11.10-da Taraz qalasynan oblystyq TJ departamentinen bir tehnıka, júzý quraly, 3 súńgýir jáne bir qutqarýshy Shýǵa qaraı jolǵa shyqty.

«Taraz qalasy men Shý aýdanynyń arasy 300 shaqyrymnan asady. Qutqarý jasaǵynyń qyzmetkerleri saǵat 15.40-ta oqıǵa ornyna jetip, izdestirý jumysyn júrgizip jatyr» dep málim etti departamenttiń baspasóz qyzmeti.