Jambyl oblysynda 36 mektepte ashana joq
Oblysta bıylǵy oqý jylynan bastap 1-4-synyp oqýshylary tegin tamaqpen qamtamasyz etilýi kerek.
Ázirge atalǵan mektepterdiń 15-inde ashana máselesi jańa mektep qurylysynyń salynýymen sheshiletin bolsa, 21 mektepte bul problema áli sheshimin tappaı tur.
Jambyl oblysynyń bilim salasynda sheshimin kútken máseleler tek bul ǵana emes.
Máselen, Moıynqum aýdanynyń №1, V.Tereshkova jáne Aǵybaı batyr mektepterinde sý tasymaldanyp, arnaıy ydysta saqtalady. Ájethanasy syrtta ornalasqan.
Shý aýdanynyń Ǵ.Muratbaev atyndaǵy orta mektebi apatty jaǵdaıda.
18 mektepte ınternet jyldamdyǵy tómen.
Al, Baızaq aýdanyndaǵy Qosaq, Moıynqum aýdanyndaǵy M.Áýezov, Qordaı aýdanyndaǵy №11, Eńbek bastaýysh mektebinde ınternet múldem joq.
Shý aýdany Tóle bı aýylynyń oqýshylary osymen ekinshi jyl tórt mektepke bólinip bilim alyp júr. Sebebi qurylysy júrgizilip jatqan ál-Farabı orta mektebinde jumys tek 70 paıyzǵa oryndalǵan.
Bul aqparattar Jambyl oblysynyń ákimi Nurjan Nurjigitovtiń qatysýymen ótken segizinshi shaqyrylǵan oblystyq máslıhattyń kezekten tys úshinshi sessııasynda aıtyldy.
Bilim salasynda sapany qamtamasyz etý departamentiniń basshysy Dámesh Úskimbaevanyń aıtýynsha, 2021-2022 oqý jylynda materıaldyq-tehnıkalyq bazamen tolyq jabdyqtalmaǵan 7 mektepke berilgen nusqama oryndalmaǵan.
«Jambyl aýdanyndaǵy №3 orta mektebine 2019 jáne 2020 jyldary berilgen nusqama búgingi kúnge deıin oryndalmady. Jańa mektep qurylysy eki jyldan beri bitken joq. Shý aýdanyndaǵy Jaısan orta mektebi jalpy orta bilim berý talaptaryna sáıkes kelmeıdi. Jańa mektep qurylysy josparlanǵanymen, másele sheshimin tappady. Materıaldar sotqa joldanyp, keıbirine aıyppul salyndy, – dedi ol.
Buǵan deıin Jambyl oblysynda úsh jylda 12 mektep salynatynyn jazǵan bolatynbyz.
