Jambyl oblysynda 33 áleýmettik dúken jumys istep tur
Óńirlik kommýnıkatsııalar qyzmetiniń baspasóz brıfınginde «Taraz» ÁKK» AQ óńirlik turaqtandyrý qory basqarý departamentiniń dırektory Arman Túımebaevtiń aıtýynsha, óńirdegi saýda núktelerinde baǵa turaqtylyǵy basty nazarǵa alynǵan. Áleýmettik mańyzy bar taýarlardyń baǵasyn retteýge septigin tıgizip otyrǵan korporatsııanyń atalǵan qory arqyly oblys turǵyndary arzan ónimmen qamtamasyz etilip otyr.
«Búgingi kúni aımaqta barlyǵy 33 áleýmettik dúken men pavılondar jumys isteýde. Onyń 22-si Taraz qalasynda oryn tepken, qalǵan 11 dúken aýdan ortalyqtarynda ornalasqan», - dep túsindirdi Arman Túımebaev.
Ol ótken jyly Taraz qalasynyń áleýmettik pavılondary men saýda núktelerinde «Taraz» ÁKK» AQ turaqtandyrý qorynyń kúrish, un, qaraqumyq jarmasy, jumyrtqa, sábiz sııaqty áleýmettik mańyzy bar azyq-túlik taýarlary satylǵanyn atap ótti. Naqtylaı aıtqanda, 406,7 mln teńgege 3 060 tonna azyq-túlik taýarlary satyp alynǵan eken. Sondaı-aq 2021 jyly 4 506,1 tonna taýar, 30,5 myń bólke nan jáne 339,36 myń dana taýyq jumyrtqasy satylǵan.
Sonymen qatar, brıfıngide kásipkerlik jáne ındýstrıaldy-ınnovatsııalyq damytý basqarmasynyń basshysy Aspandııar Seısebaev Memleket basshysynyń tapsyrmasy boıynsha oblysta áleýmettik mańyzy bar azyq-túlik ónimderiniń baǵasyn ustap turýǵa qatysty birqatar baǵyt boıynsha jumystar júrip jatqanyn jetkizdi.
«Qoldanystaǵy zańnamaǵa sáıkes jergilikti atqarýshy organdar saýda ústemesi mólsheriniń saqtalýyn baqylaý boıynsha jumystar júrgizýde. Dúkenderde áleýmettik mańyzy bar azyq-túlik taýarlaryna ústemaqy qoıý 15% aspaýy tıis. Alaıda, baqylaý jumystaryn júrgizýde úıde ornalasqan dúkenderdiń kóptigine jáne osy dúkenderde resmı qujat aınalymynyń bolmaýy sııaqty qıyndyqtar kezdesedi. Bul dúkender boıynsha oblys aýdandary men Taraz qalasy ákimdikteriniń baqylaý boıynsha monıtorıngtik toptary naqty jumys júrgizetin bolady», - dedi basqarma basshysy.
