Jambyl oblysynda 300 myńnan astam medıtsınalyq maska qory bar
TARAZ. QazAqparat - Jambyl oblysynyń ákimdiginde jedel shtabtyń kezekti otyrysy ótip, Memleket basshysynyń tótenshe jaǵdaı jónindegi memlekettik komıssııa otyrysynda júktegen tapsyrmalaryn júzege asyrý sharalary talqylandy, dep habarlaıdy QazAqparat oblys ákimdigine silteme jasap.
« Prezıdent koronavırýs ınfektsııasynyń taralýyn boldyrmaý jáne daǵdarysqa qarsy sharalar paketin qabyldaý boıynsha birqatar tapsyrma bergeni málim. Bizdiń mindetimiz - olardyń sapaly jáne ýaqytyly oryndalýyn qamtamasyz etý, óńirdegi turaqtylyqty saqtaý», - dedi oblys ákimi Berdibek Saparbaev.
Oblys ákiminiń orynbasarlary, Qordaı, Jambyl, Shý aýdandarynyń ákimderi, jaýapty memlekettik organdardyń basshylary óńirde qabyldanyp jatqan sharalar týraly baıandady.
Búginde rezervte 300 myńnan astam medıtsınalyq maska, 17 myń respırator, 230 myń bir rettik qolǵap, 9,5 myń medıtsınalyq kostıým bar.
Qazirgi tańda oblys boıynsha medıtsınalyq mekemelerde karantınge 25 adam jatqyzylǵan. Olardyń jaǵdaıy qanaǵattanarlyq, synama teris nátıje kórsetken. Óńirde barlyǵy 1 190 tósek-oryn daıyndalǵan jáne 758 medıtsınalyq qyzmetker jumyldyrylǵan.
Atalǵan jıyndy qorytyndylaı kele, Berdibek Saparbaev oblys halqynyń densaýlyǵyn saqtaý jáne qorǵaý boıynsha qajetti aldyn alý sharalaryn qabyldaý úshin barlyq memlekettik organdardyń ózara uıymshyldyqpen jumys isteý qajettigin atap ótti. Azyq-túlik qaýipsizdigin qamtamasyz etýge, jergilikti taýar óndirýshilerdi qoldaýǵa jáne saýda jelilerin otandyq azyq-túlikpen toltyrýǵa erekshe nazar aýdarýdyń mańyzdylyǵyna toqtaldy.
Sondaı-aq, «Aısha bıbi» jáne «Qarasý» ótkizý pýnktterinde shekaralyq jáne sanıtarlyq baqylaýdy kúsheıtý, onda jumys isteıtin medıtsınalyq qyzmetkerlerdi teplovızormen jáne qorǵanys quralymen qamtamasyz etý qajettigi, shekarada keptelis týyndamaý úshin qajet bolǵan jaǵdaıda keden qyzmetkerleriniń sanyn ulǵaıtý kerektigi aıtyldy. Taraz qalasynyń ákimdigine qoǵamdyq oryndardy, aıaldamany, saýda jáne áleýmettik nysandardy dezınfektsııalaý jumysyn jalǵastyrý tapsyryldy.
«Memleket basshysy buryn-sońdy bolmaǵan sharalar qabyldady. Jergilikti deńgeıde salyq preferentsııasy men qoldaýdy eseptemegende, daǵdarysqa qarsy sharalardyń jalpy paketi 4,4 trıllıon teńgeni nemese 10 mıllıard dollardy quraıdy. Qala jáne aýdan ákimderi jergilikti jerlerde halyqqa jáne kásipkerlerge bıznesti qoldaý jáne jumys oryndaryn saqtaý boıynsha memleket tarapynan qandaı sharalar qolǵa alynyp otyrǵandyǵyn túsindirý kerek», - dep túıindedi Berdibek Saparbaev.
