Jambyl oblysynda 30 úıdiń aýlasyn sý basqan
TARAZ. QazAqparat – Jambyl oblysynda tolassyz jaýynnan aýlalardy sý basty, dep habarlaıdy QazAqparat tilshisi.
Taraz qalasynda nóser jańbyr men tazartylmaǵan aryqtardyń saldarynan 17 aýla aýmaǵyn sý basqan. TJD jáne jergilikti atqarýshy organdar qyzmetkerleriniń kúshimen barlyǵy 39 adam, 9 tehnıka jáne 9 motopompamen jumys júrgizilýde. Qazirgi ýaqytta turǵyn úılerge qaýip tónip turǵan joq.
Sondaı-aq, Jýaly aýdanynda 2 saǵat 49 mınýtqa sozylǵan jaýyn-shashynnan kólbeý aǵyn paıda bolyp, saldarynan Qońyrtóbe aýylyndaǵy aýla aýmaqtaryn sý alyp, Maıbulaq aýylyndaǵy bes úıdiń aýlasyn sý basty. Al, Baızaq aýdany, Sarykemer aýylynda bes aýlany sý basqan. Sý deńgeıi 18-20 sm. Turǵyn úılerdi sý basý qaýpi joq.
TJD jáne jergilikti atqarýshy organdardyń kúshimen barlyǵy 22 adam, 6 birlik tehnıka jáne 4 motopompa sýdy sorý, aryq júıesin tazalaý jáne nyǵaıtý boıynsha jumystar júrgizilýde.
Tótenshe jaǵdaılar departamenti baspasóz qyzmetiniń habarlaýynsha, jalpy oblys boıynsha jaýyn-shashyn saldarynan barlyǵy 30-dan astam aýla aýmaǵyn sý basqan.
