Jambyl oblysynda 3 sý qoımasy salynsa, Qyrǵyzstanǵa táýeldilik azaıady - mınıstr
NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev qyrǵyz tarapynan alatyn sýdyń bir bóligin jergilikti sý qoımalaryn salý arqyly qamtamasyz etýge bolatynyn aıtty, dep habarlaıdy QazAqparat tilshisi.
«Shý jáne Talas ózenderi boıynsha qyrǵyz tarapymen memleketaralyq paıdalanýdaǵy gıdrotehnıkalyq qurylystardy kútip ustaýǵa jáne rekonstrýktsııalaýǵa bólinetin qarjyny kóbeıtý boıynsha jumys júrgizilip jatyr», - dedi ol Májilis qabyrǵasyndaǵy Parlamenttik tyńdaýda.
Onyń aıtýynsha, Shý men Talastan sý alyp otyrǵan óńirlerde jerasty sýyn paıdalaný kólemi ulǵaımaq.
«Qyrǵyz tarapyna táýeldilikti azaıtý úshin Jambyl oblysynda 3 sý qoımasyn salý jumysy bastalyp, sýarý qajettigi úshin jerasty kózderin paıdalaný kólemi ulǵaıady», - dedi Serikqalı Brekeshev.
Májilis tóraǵasy Erlan Qoshanovtyń málimeti boıynsha, 2040 jylǵa qaraı Qazaqstanda sý tutyný 46 paıyzǵa artady.
