Jambyl oblysynda 3 mıllıonǵa jýyq mal toǵytýǵa tústi

TARAZ. QazAqparat – Jambyl oblysynda búginde 4 mıllıon 240 myńǵa jýyq qoı-eshki bar. Onyń 3 mıllıonyn toǵytý josparlanǵan. Qazirgi tańda 2 mıllıon 973 mıllıon 222 myńy toǵytýǵa túsip, túrli zııankesterden zalalsyzdandyryldy, dep habarlaıdy QazAqparat tilshisi.

Jalpy, oblysta mal toǵytý jylyna eki ret arnaıy dezınfektsııalyq ertindimen jasalady. Maldy toǵytý keneniń barlyq túrinen, bıtterden jáne taǵy da basqa parazıtterden tazarýǵa múmkindik beredi.

Jambyl oblystyq veterınarııa basqarmasy veterınarııalyq qaýipsizdikti qamtamasyz etý bóliminiń basshysy Talǵat Qojabergenovtiń aıtýynsha, oblys aýmaǵynda 154 mal toǵytpasy bar. Onyń 12-siniń qurylysy bıýdjet qarajaty esebinen salynǵan.

«Baızaq aýdanynda 1, Jambylda – 3, Sarysýda – 5, Talas aýdanynda 3 mal toǵytpasy salyndy. Qalǵandary jeke sharýashylyqtardyń ıeliginde. Biraq, bul toǵytpalar áli de jetkiliksiz bolyp otyr. Aýdan ákimdikterinen qajettilikterin anyqtap, toǵytpalarmen qamtamasyz etý suralyp jatyr. Buryn uıymdasqan agroqurylymdardyń árqaısysynda myńdaǵan qoı órgizgen kezde qoı-eshkilerdi toǵytý ózinshe bir naýqan bolyp sanalatyn. Qazirgi tańda barlyǵy jeke sharýa qojalyqtardyń úlesinde. Sondyqtan, mal toǵytýdy árkim óz bilgenimen júrgizip júr. Degenmen, kóptegen mal ıeleri ony qalaı toǵytý, qandaı preparattar qoldaný kerektigi týraly tolyq bile bermeıdi. Sondyqtan da mal toǵytýdy mal dárigeriniń qadaǵalaýymen júrgizgen durys», - deıdi T. Qojabergenov.

Aıta keteıik, buǵan deıin Jambyl oblysynda tórt túlikti asyldandyrý jumystary bastalǵanyn jazǵan bolatynbyz.