Jambyl oblysynda 280 myńdaı adam saqtandyrylmaǵan

TARAZ. QazAqparat - Jambyl oblysynda «Saqtandyrý» aqparattyq júıesinde saqtandyrylmaǵan turǵyndar sany 279 043 adamdy quraıdy, dep habarlaıdy QazAqparat tilshisi.

Saqtandyrylmaǵandardyń ishinde 42446 jaldamaly jumysker, 6451 jeke kásipker bolsa, azamattyq-quqyqtyq sıpattaǵy sharttar boıynsha qyzmet kórsetetin adam sany – 6185. Al, 156 myńnan astam turǵyn sońǵy 12 aı ishinde jarna tólemegendikten, olardyń mindetti áleýmettik medıtsınalyq saqtandyrý júıesindegi mártebesi áli anyqtalmaı otyr.

Bul týraly óńirlik kommýnıkatsııalar qyzmetinde ótken baspasóz brıfınginde áleýmettik medıtsınalyq saqtandyrý qorynyń oblys boıynsha fılıaly dırektorynyń orynbasary Ǵaını Aımaǵanbetova aıtty. Spıkerdiń sózine súıensek, óńir halqynyń 77,2 paıyzy medıtsınalyq saqtandyrý júıesine qatysý quqyǵyna ıe.
– Ulttyq statıstıka bıýrosynyń derekterine sáıkes, qazirgi tańda oblys halqynyń 942 myńnan astamy saqtandyrylǵan. Jalpy, medıtsınalyq uıymdarǵa 1 169171 turǵyn tirkelse, 52043 azamat áli de emhanalarǵa tirkelmegen.
Mindetti áleýmettik medıtsınalyq saqtandyrý qarajaty esebinen qarjylandyrylatyn bir baǵyt – azamattardyń jekelegen sanattaryna stomatologııalyq kómek kórsetý. Sońǵy ýaqytta bul qyzmetke turǵyndardyń suranysy arta tústi. Máselen, ótken jyly stomatologııalyq klınıkalardyń kórsetken qyzmetine 2 mıllıonnan astam qarjy jumsalǵan. Qor tarapynan óńir turǵyndaryn ońaltý maqsatynda 4 mıllıon teńgeden astam qarajat bólindi, – dedi ol.
Sonymen qatar, Ǵaını Aımaǵanbetova el Prezıdenti Qasym-Jomart Toqaevtyń tapsyrmasymen iske qosylǵan «Ańsaǵan sábı» baǵdarlamasy mindetti áleýmettik medıtsınalyq saqtandyrý júıesinde sátti júzege asyrylyp jatqanyna toqtaldy. Baǵdarlama aıasynda ótken jyly 263 kvota bólinse, bıyl onyń sany – 245.
Aıta keteıik, osy jyldyń 4 aıynda áleýmettik medıtsınalyq saqtandyrý qorynyń óńirlik fılıalyna 76 ótinish pen shaǵym túsken. Bul ótken jyldyń tıisti kezeńimen salystyrǵanda 37,7 paıyzǵa tómen.
Buǵan deıin Jambyl oblysynda turǵyndary túıneme juqtyrǵan aýyl karantınge jabylǵanyn jazǵan bolatynbyz.