Jambyl oblysynda 28 jylda 870-ten astam áleýmettik nysan salyndy
Oblysta Táýelsizdik jyldary áleýmettik sala aıtarlyqtaı kórsetkishke qol jetkizdi desek, osy ýaqyt aralyǵynda óńire 871 áleýmettik nysan salynǵan. Atap aıtar bolsaq, 28 jylda barlyǵy 245 bilim, 126 densaýlyq saqtaý, 500-ge tarta sport nysandary jańadan boı kóterip, esigin aıqara ashqan.
«Táýelsizdik alǵan jyldardan bastap, óńirde 126 medıtsınalyq nysan salyndy. Qazir jalpy sany 391 densaýlyq saqtaý uıymy turaqty qyzmet kórsetedi. Tıisinshe salany qarjylandyrý da ondaǵan esege artqan. Máselen, 2000 jyly salaǵa bólingen qarjy 2 mıllıard teńge bolsa, aǵymdaǵy jyly ol kórsetkish 61,4 mıllıardqa jetip otyr», - deıdi oblystyq Densaýlyq saqtaý basqarmasynyń basshysy Marat Jumanqulov.
Aımaqta «Jasyl ekonomıka» baǵytyndaǵy jumystar da kósh ilgeri. Bul sala ásirese, 2010 jyldan beri qarqyn alýda. Qazir kún, sý jáne jelden qýat óndiretin 11 elektr stansasy jumys istep tur. Olardyń jalpy qýatylyǵy 169 megavatt. Aıta ketý kerek, qazir jergilikti turǵyndar balamaly energııa kózderinen óndiriletin energııanyń 20 protsentin tutynyp otyr.
«Búginde óńirde taǵy bes jobanyń qurylysy júrgizilýde. Olardyń jalpy quny 118,5 mıllıard teńge, qýattylyǵy 233 megavatty quraıtyn bolady. Eki jobany bıyl jyl sońyna deıin iske qosýdy josparlap otyrmyz», - deıdi oblystyq energetıka jáne TÚKSh basqarmasy basshysynyń orynbasary Qudaıbergen Qorǵanbaev.
Aıta keteıik, Táýelsizdik jyldary aımaqta atqarylǵan jumystardy aýyz toltyryp aıtýǵa bolady. Aıtalyq, oblys bıýdjeti sońǵy 15 jylda 12 esege artqan. Bıyldyń ózinde óńirdiń ekonomıkalyq kórsetkishi 5 protsentke ósken. Óndiris kólemi 6,5, jeke ınvestıtsııa 20 protsentke jetti. Bıyl jyl basynan beri 430 myń sharshy metr turǵyn úı paıdalanýǵa berildi.
