Jambyl oblysynda 27 jolaýshysy bar avtobýs aýdarylyp qaldy
TARAZ. QazAqparat - Jambyl oblysynyń Qordaı aýdanyndaǵy trassa boıynda jol apaty boldy, dep habarlaıdy «QazAqparat» HAA tilshisi.
1 shilde kúni Jambyl oblysyndaǵy trassanyń «Almaty-Shymkent» bóliginde halyqaralyq baǵyttaǵy jolaýshylar avtobýsy jol-kólik oqıǵasyna ushyrady. Kóliktiń salonynda 27 jolaýshy bolǵan.
Jambyl oblystyq ІІD ókilderiniń aldyn ala málimetteri boıynsha, avtobýs durys burylmaı, qısaıyp baryp, bir shetine jatyp qalǵan. Apattyń saldarynan 27 jastaǵy qyz mert bolyp, 6 jolaýshy aýyr jaraqat aldy.
Jambyl oblystyq Densaýlyq saqtaý basqarmasy ókilderiniń «QazAqparat» HAA tilshisine jol apatynan zardap shekkenderge qatysty bergen habarlamasyna sáıkes, 1 shilde kúni Qordaı aýdandyq ortalyq aýrýhanasyna 26 adam densaýlyǵyna shaǵym aıtyp kelgen. Bir adam jedel járdem kóligi jetkenshe, jantásilim etken. 23 adam medıtsınalyq kómek kórsetilgen soń turǵylyqty jeri boıynsha ambýlatorııalyq em alý úshin úılerine qaıtarylǵan.
«Bir otbasynyń 3 múshesi (ata-anasy men qyzy) Qordaı aýdandyq ortalyq aýrýhanasynyń hırýrgııa bólimine jatqyzyldy. Búgingi tańda olardyń jaǵdaıy turaqty, ortasha deńgeıde. Endi olar em alýdy Shymkent qalasynda jalǵastyrady»,-dep naqtylady oblystyq densaýlyq saqtaý basqarmasynyń ókilderi.
Olardyń málimetterinshe, jol apaty bolǵan jerde 4 jedel medıtsınalyq járdem qyzmeti jumys istegen.
