Jambyl oblysynda 27 qoıma salynady
Bul týraly Jambyl oblysy ákiminiń orynbasary Qanatbek Mádibek óńirlik kommýnıkatsııalar qyzmetinde ótken brıfıngte aıtty.
«Oblysta aýyl sharýashylyǵy salasy boıynsha bıyl sý únemdeý tehnologııalaryn engizýge, sút ónimderin óńdeýge jáne kókónis saqtaý qoımalary, bordaqylaý alańdary, sút-taýarly fermalary, qus jáne balyq sharýashylyǵyn damytýǵa baǵyttalǵan 11 ınvestıtsııalyq joba iske asyrylyp, 225 jańa jumys orny qurylady.
Osy jobalar aıasynda 2 kókónis jáne 1 jemis-jıdek saqtaıtyn qoıma salý josparlanyp otyr. Atap aıtar bolsaq, «Azııa sad» JShS – 5,6 myń tonna, «Matyshev» JShS – 20 myń tonna, «ORTs Taraz» 2-kezeń – 15 myń tonna.
Jalpy, 2025 jylǵa deıin syıymdylyǵy 61,3 myń tonnany quraıtyn 27 qoımany iske qosý kózdelip otyr», – dedi oblys ákiminiń orynbasary.
Aıta keteıik, qazirgi tańda oblystaǵy qoımalarda 13,3 myń tonnaǵa jýyq ónim saqtalǵan. Onyń ishinde 72 tonna kartop, 2900 tonna sábiz, 40 tonnaǵa jýyq pııaz, 10,1 myń tonna basqa da ónimder bar.
Buǵan deıin Jambyl oblysy mal sany boıynsha respýblıkada ekinshi orynda turǵanyn habarlaǵan bolatynbyz.