Jambyl oblysynda 26 adam qyzylshamen aýyrdy
TARAZ. QazAqparat - Jambyl oblysynyń qoǵamdyq densaýlyqty saqtaý departamenti óńirde qyzylsha aýrýyna qatysty jaǵdaıǵa alańdaýǵa negiz joq ekenidigin málimdedi, dep habarlaıdy QazAqparat tilshisi.
«Búginde Jambyl oblysynda 26 adam qyzylshamen aýyrǵany tirkeldi. Bul kóp emes. Basqa óńirlermen salystyrǵanda, bizdegi ahýal kóńil kónshiterlik. Sol 26 adamnyń 23-ine vaktsına egilmegen», - deıdi Jambyl oblysynyń qoǵamdyq densaýlyqty saqtaý departamentiniń basshysy Berik Jarqymbekov.
Departamenttiń aqparatyna súıensek, qyzylshamen aýyrǵandardyń toǵyzy - bir jasqa deıingi balalar. Sondaı-aq ózine dáriniń egilgen-egilmegenin bilmeıtinder de bar.
Vedomstvonyń málimdeýinshe, oblysta dári egý qalypty júrip jatyr, bas tartqandar kóp emes. 2018 jyly josparly túrde bir jasqa deıingi 23 myń balaǵa, alty jasqa deıingi 25 myń balaǵa dári egilgen. Bıyl 30 jasqa deıingi 1 800 adam qyzylshaǵa qarsy vaktsınany erikti túrde salǵyzǵan.
Berik Jarqymbekovtiń aıtýynsha, oblysta aýrýdyń aldyn alý sharalary belsendi túrde júrgizip keledi. «Mektepterde, balabaqshalarda túsindirý jumystary júrgizip, turǵyndarǵa aýrýdyń aldyn alý sharalary, alǵashqy belgileri týraly aıtamyz», - dedi ol.
Avtory: Galına Skrıpnık
