Jambyl oblysynda 25 ata-ana jaýapkershilikke tartyldy
«Túngi qaladaǵy balalar» jedel-aldyn alý is-sharasy barysynda Jambyl oblystyq Polıtsııa departamenti bastyǵynyń orynbasary Fahrıtdın Shankarov, Jergilikti polıtsııa qyzmeti basqarmasynyń bastyǵy Rahymberdi Áshkeev, sondaı-aq Taraz qalasy Polıtsııa basqarmasy basshylyǵy eriktilerdiń, jurtshylyq pen blogerlerdiń qatysýymen reıd uıymdastyrdy.
Reıd barysynda ishki ister organdaryna 28 kámeletke tolmaǵan bala jetkizilip, 25 ata-ana ákimshilik jaýapkershilikke tartyldy.
«Túngi reıdterdiń negizgi baǵyttary –18 jasqa tolmaǵan, zańdy ókildersiz túngi ýaqytta oıyn-saýyq jáne kóńil kóterý oryndarynda júrgenderdi anyqtaý, jasóspirimderdiń qadaǵalaýsyz qalýynyń jolyn kesý jáne kámeletke tolmaǵandar arasyndaǵy quqyq buzýshylyqtardyń aldyn alý. Biz saıabaqtar, alańdar, kafe-barlar, kompıýter klýbtary jáne basqa da jastar jınalatyn oryndardy araladyq», - dedi Fahrıtdın Shankarov.
Onyń aıtýynsha, keıbir balalar túni boıy onda oıyn oınap, otyra beredi. Eger mundaı kemshilik bolsa, jasóspirimderdiń qujatyn teksermegen klýb ákimshisi nemese mekeme ıesi jazalanady.
«Aıyppul ákimshilik tártippen 10-nan 50 AEK-ke deıingi mólsherde salynady. Bala polıtsııa bólimshesine jetkizilip, onyń ata-anasy ne zańdy ókilderi isti qaraý úshin shaqyrylady. Eger bala únemi qadaǵalaýsyz sendelip júrse, ata-anasy ata-ana tárbıesindegi mindetterin oryndamaǵany úshin jaýapkershilikke tartylady», - dep túsindirdi Rahymberdi Áshkeev.