Jambyl oblysynda 234 mektep dástúrli formatta oqyp jatyr
Bıyl qashyqtan oqytý jaǵdaıynda jumys istegen muǵalimder kóptegen máselelerge tap bolǵany jasyryn emes. Oqýshylarǵa da jańashyldyqqa beıimdelýge týra keldi.
Óńir basshysy Berdibek Saparbaevtyń bilim salasy qyzmetkerlerimen kezdesýinde bul úderistiń bizdiń oblysta qanshalyqty sátti ótkendigi týraly saralandy.
Kezdesý M.H.Dýlatı atyndaǵy Taraz óńirlik ýnıversıtetiniń tehnologııalyq korpýsynda ótti. Oǵan beınekonferents-baılanys rejıminde barlyq aýdandardaǵy aýyl mektepteriniń muǵalimderi de qatysty.
Oblys ákimi bıyl bilim salasyn damytýǵa 185,8 mıllıard teńge bólingenin, bul ótken jylmen salystyrǵanda 23 paıyzǵa kóp ekenin basa aıtty.
«Memleket tarapynan kórsetilip jatqan aýqymdy qoldaýlardyń túpki maqsaty – bilim sapasyn arttyrý. «Pedagog mártebesi týraly» zańnyń qabyldanýymen muǵalimder jańa quqyqtar men múmkindikterge ıe boldy. Mektepterdiń materıaldyq-tehnıkalyq bazasy jaqsaryp keledi», - dedi Berdibek Saparbaev.
22 bilim berý nysanynyń qurylysyna 10 mıllıardtan astam teńge qaraldy. 43 bilim berý nysany kúrdeli jóndeýden, 56 nysan aǵymdaǵy jóndeýden ótken.
Memleket basshysynyń tapsyrmasy boıynsha aýladaǵy dárethana máselesi tolyǵymen sheshildi. Barlyq mektepte beınebaqylaý kamerasy ornatylǵan.
Ol mektepterdiń basym bóliginde dástúrli oqytý formatyna kóshýge barlyq múmkindikter bar dep sanaıdy.
Biraq artyq jumysty moınyna alǵysy kelmeıtin jaýaptylar oǵan bas aýyrtpaıdy.
«Aıtalyq, 600 oqýshyǵa arnalǵan mektepte 150 bala oqıdy. Nelikten dástúrli oqytýdy uıymdastyrmasqa? Al dırektor bul jumysqa kelgende selsoq. Ol balalardyń qalaı bilim alyp jatqanyna, keıin qandaı maman bolatynyna mán bermeıdi. Bul - bir ǵana mysal. Balalardyń mektepke baryp, muǵalimdermen betpe-bet júzdesip, qarym-qatynas ornatýy asa mańyzdy. Ásirese, bul túlekterge qatysty», - dedi oblys ákimi.
Bilim basqarmasynyń basshysy Gúlnár Hodjabergenova epıdemıologııalyq ahýal jaqsy shalǵaıdaǵy aýyldarda ornalasqan 234 mektep shtattyq rejımde jumys istep jatqanyn aıtty. Oblys boıynsha 221 mektepte 4493 kezekshi synyp ashylǵan.
Oblys ákiminiń suraǵyna jaýap bergen Gúlnár Hodjabergenova barlyq bala kompıýtermen jáne roýtermen qamtamasyz etilgenin jetkizdi.
«Oǵan birinshi kezekte az qamtylǵan otbasydan shyqqan, erekshe qajettiligi bar, jetim jáne kópbalaly otbasydan shyqqan balalar qol jetkizdi»,-dedi basqarma basshysy.
