Jambyl oblysynda 22 gektar aýmaqta jel elektrstantsııasy salynýda
TARAZ. QazAqparat – Jambyl oblysy Talas aýdanynda 22 gektar aýmaqta jel elektr stantsııasy salynýda. Aýdanǵa arnaıy jumys saparymen barǵan aımaq basshysy Berdibek Saparbaev stantsııanyń qurylysymen tanysty, - dep habarlaıdy QazAqparat oblys ákimdiginiń resmı saıtyna silteme jasap.
Oblys ákimi Talas aýdanyndaǵy «Wind Power City» jaýapkershiligi shekteýli seriktestiginiń jel elektr stantsııasyna da bardy. Osy joba aıasynda 1,8 mıllıard teńgeniń ınvestıtsııalary tartyldy. Qazirdiń ózinde munda jalpy qýattylyǵy saǵatyna 9 MVt quraıtyn jeti jel generatory salyndy. Investorlardyń aıtýynsha, stantsııa tamyzdyń basynda jumys isteı bastaıdy. Jobanyń ekinshi kezeńinde jel qozǵaltqyshtarynyń sany toǵyzǵa artady.
«Jambyl oblysy balamaly energetıka salasynda aıtarlyqtaı áleýetke ıe. Aımaqtyń klımattyq jaǵdaılaryn múmkindiginshe tıimdi paıdalaný qajet. Jańartylatyn energııa kózderi jobalarynyń kómegimen kóptegen eldi mekenderdi elektr qýatymen qamtamasyz etip qana qoımaı, ekologııamyzdy saqtaýǵa bolady», – dedi oblys ákimi.
Budan soń aımaq basshysy aýdandaǵy birqatar nysandarǵa at basyn buryp, áleýmettik mańyzy bar jobalardyń qalaı júzege asyrylyp jatqandyǵyn tekserdi.
Aıta keteıik, aǵymdaǵy jyly Talas aýdanynda 77 jobany júzege asyrýǵa 5,6 mıllıard teńgeden astam qarjy bólingen.
Berdibek Saparbaev ortalyqtandyrylǵan sý qubyrynyń qurylysy aıaqtalýǵa taıaý qalǵan Maıtóbe aýylyna bardy. Merdiger uıym «Pyraq-Qurylys» JShS nysandy maýsym aıynyń sońynda tapsyrmaq. Nátıjesinde eldi mekendegi barlyq 328 aýla taza aýyz sýmen qamtamasyz etiledi dep kútilýde.
Sondaı-aq, óńir basshysy aýyldyq dárigerlik ambýlatorııany aralap kórdi. Ol medıtsınalyq qyzmetkerler men kúndizgi statsıonarda em alyp jatqan naýqastardy áńgimege tartty.
Odan ári oblys ákimi shalǵaı ornalasqan Qaraoı aýylyna bardy. Jýyrda ǵana mundaǵy 1987 jyly salynǵan aýyldyq klýbta kúrdeli jóndeý jumystary bastalǵan. Merdiger «Ýmara» JShS nysannyń shatyryn, edenin aýystyrýdy josparlaǵan. Oblys ákimi qabyrǵalarda paıda bolǵan jaryqtarǵa nazar aýdaryp, ǵımarattyń apatty jaǵdaıda turǵanyna jáne qalpyna keltirilmeı otyrǵandyǵyna alańdaýshylyq bildirdi. Berdibek Saparbaev qosymsha qarajat kózderin qarastyryp, eski ǵımaratty buzyp, ornyna jańa aýyldyq klýbyn salýdy tapsyrdy.
Bıyl Talas aýdanynda jalpy quny 1,3 mıllıard teńge bolatyn 52,3 shaqyrym jol jóndeledi. Al aýyldardy taza aýyz sýmen qamtamasyz etýge 1,1 mıllıard teńgeden astam qarajat bólingen. Aýyz sý júıesi bıyl Qarataý qalasy men Maıtóbe aýylyna júrgizilmek. Al Bostandyq jáne Tamabek aýyldaryndaǵy aýyz sý júıesi aǵymdaǵy jóndeýden ótkiziledi. Sondaı-aq, bıyl Talas aýdanynyń eldi mekenderinde eki mektepke kúrdeli jóndeý, al 11 mektepke aǵymdaǵy jóndeý jumystary josparlanǵan.
Al Qarataýda turǵyn úı qurylysy qarqyndy júrip jatyr. «Nurly jer» baǵdarlamasy boıynsha 55 páterlik turǵyn úı qaıta jańartylýda. Kezekte turǵan kópbalaly otbasylar úshin eki turǵyn úı salynýda. Qurylys nysandaryn aralap, páterlerge kirip kórgen Berdibek Saparbaev barlyq qajetti ınfraqurylymdy ýaqytyly júrgizýdi tapsyrdy.
