Jambyl oblysynda 200-ge jýyq bala qaterli isikke shaldyqqan
TARAZ. QazAqparat – Jambyl oblystyq kópbeıindi balalar aýrýhanasynyń onkogematologııa kabınetinde «Ashyq esik» kúni ótti. Onda naýqas balalardy joǵary bilikti balalar onko-gematology Sholpan Túlenbetova qabyldady,- dep habarlaıdy QazAqparat tilshisi.
Jalpy, Qazaqstanda jyl saıyn 600 balaǵa «obyr» dıagnozy qoıylady. Al Jambyl oblysynda búgingi tańda 200-ge jýyq baladan qaterli isik anyqtalyp esepte tur. Óńirde jyl saıyn 15 baladan mundaı dıagnoz alǵash ret anyqtalady eken.
Shara barysynda aýrýhananyń pedıatrııa bólimshesinde atalǵan dertten emdelip jatqan kishkentaı patsıentterge arnalǵan kóńildi oıyndar ótkizilip, oıynshyqtar tabystaldy.
«Qazir elimizde balalar arasynda kezdesetin onkologııa aýrýlaryn emdeý tıimdiligi 70-90 paıyz. Genetıkalyq aqaýlarǵa baılanysty paıda bolatyn qaterli isikterdiń qaýipti túrleri kóp. Ázirge olardy emdeý nátıjesi tómen. Biraq álemdik medıtsına damyp keledi, Qazaqstanda aýrýdy emdeý men baqylaýda ustaýǵa múmkindik bar. Bala aǵzasyndaǵy onkologııa aýrýyn anyqtaý, shynymen, qıyn. Sondyqtan, ata-ana balasynyń densaýlyǵyna óte muqııat qaraýy kerek. Qaterli isik terapııasynyń tıimdiligi der kezinde qoıylǵan dıagnozǵa baılanysty ekenin este ustaǵan jón»,-dedi Sholpan Týlenbetova.
Sondaı-aq, mamannyń aıtýynsha, onkologııa aýrýynyń alǵashqy belgilerine álsizdik, belsendiliktiń tómendeýi, teriniń bozarýy, loqsý, qusý jatady. Mundaı jaǵdaıda ata-ana birden balany nevropatologqa qaratyp, skrınıng jáne MRT-dan ótkizýi kerek.
