Jambyl oblysynda 2 myńnan astam adam qashyqtan jumysqa kóshken
TARAZ. QazAqparat – Tótenshe jaǵdaıǵa baılanysty Jambyl oblysynda 2 062 jumysker aqysyz eńbek demalysyna jiberilse, 2 119 azamat qashyqtan jumys isteý rejımine kóshti. Bul týraly Óńirlik kommýnıkatsııalar qyzmetinde ótken brıfıngte oblystyq Eńbek ınspektsııasy basqarmasynyń basshysy Qaırat Dosaev aıtty, dep habarlaıdy QazAqparat.
Koronavırýs pandemııasyna baılanysty elimizde tótenshe jaǵdaı jarııalanyp, Taraz qalasy men Jambyl oblysynda halyqtyń qaýipsizdigin jáne indettiń taralmaýyn qamtamasyz etý maqsatynda karantındik rejım engizilgeni belgili. Bul oraıda, aımaq ákiminiń qaýlysymen jedel shtab qurylyp, onyń jumysyn uıymdastyrý maqsatynda ár baǵyt boıynsha 7 jedel top jasaqtalǵan bolatyn. Osy jedel toptardyń biri – «Áleýmettik qorǵaý jáne eńbek qatynastary» tobynyń múshesi, óńirdegi eńbek ınspektsııasy basqarmasynyń basshysy Qaırat Dosaev tótenshe jaǵdaı kezindegi eńbek qatynastary men áleýmettik qorǵaý sharalary týraly aıtyp berdi.
«Jedel top músheleri tótenshe jaǵdaı kezinde jumys berýshilermen qabyldanyp jatqan jáne áleýmettik qoldaý sharalary boıynsha tıisti jumystardy atqaryp, taldaý jasady. Máselen, Jambyl óńirinde sońǵy ahýalǵa oraı 2 062 jumysker aqysyz eńbek demalysyna jiberildi. Demek, olardyń mindetti áleýmettik saqtandyrý qorynan 42500 teńge alýyna múmkindikteri bar. Sondaı-aq 1 413 jumysker aqyly eńbek demalysyna bosatylsa, 2 119 azamat qashyqtan jumys isteý rejımine ótti. Eńbek kodeksiniń 138-babyna sáıkes, olardyń eńbekaqysy tolyq kólemde saqtalatyn bolady», - dedi Qaırat Dosaev.
Ol oblystaǵy 370 qyzmetkerdiń tolyq emes jumys rejımine kóshkenin de aıtyp, Eńbek kodeksiniń 70-babyna saı, olar jumys atqarǵan ýaqytyna qaraı eńbekaqy alatyndyǵyn málimdedi. 418 jumysker bos otyryp qalý yqtımaldylyǵyna baılanysty demalysqa jiberilgen. Olarǵa Eńbek kodeksiniń 112-babyna sáıkes jalaqylarynyń eń tómengi mólsherinen kem emes kólemde tólem júrgizilmek.
